ನಾ ಮರೆಯಲಾರೆ

ನಾ ಮರೆಯಲಾರೆ

ದಟ್ಟಡವಿಯಲಿ ಅಂಡಲೆಯುವಾಗ
ಕೈಹಿಡಿದು ಸನ್ಮಾರ್ಗವ ತೋರಿ ದಡ
ಸೇರಿಸಿದ ಗುರುವಿಗೆ ಗುಲಾಮನಾಗಿರುವೆ

ಸಾಕಿ ಸಲಹಿ ಕಷ್ಟ ಕೋಟಲೆಗಳ
ಜೀರ್ಣಿಸಿಕೊಂಡು ಬದುಕಿನ ಬೆಲೆಯ ಅಳೆದು
ತೂಗಿದ ಹೆತ್ತೊಡಲ ಋಣವ ತೀರಿಸಲಾರೆ

ಮೈಮನಗಳಲಿ ಸುಳಿದಾಡಿ ಭಾವನೆಗಳ
ರಮಿಸಿ ಸುಖದ ಸೋಪಾನದಲಿ ತೇಲಿಸಿ
ವಾಸ್ತವದಲೆ ಅಪ್ಪಳಿಸಿದಾಗ ತೇಲಿ ಹೋದ
ಸಂಗಾತಿಗಳ ಸಂಗತಿಗಳ ಮರೆಯಲಾರೆ

ಕಂಡ ಕನಸುಗಳ ಕಸುವು ಹೆಚ್ಚಿಸಲು
ನೀರೆರೆದ ಕೈಗಳಿಗೆ ನಮಿಸದಿರಲಾರೆ

ಸಾವಿರಾರು ಕನಸುಗಳಿಗೆ ಬಣ್ಣ ತುಂಬುವೆ
ಎಂದು ಪಾಠ-ಪ್ರವಚನಗಳ ಮಂತ್ರ ಮುಗ್ಧರಾಗಿ
ಆಲಿಸಿದ ಕಿವಿಗಳ ರಿಂಗಣವ ನಿಲ್ಲಿಸಲಾರೆ

ನಕ್ಕು ನಲಿದು ಮುಗ್ಧತೆಯ ಪಾಠ ಕಲಿಸಿ
ಅಪ್ಪುಗೆಯ ಆಲಿಂಗನದಲಿ ನನ್ನ ನಾ
ಮರೆಯುವಂತೆ ಮಾಡಿದ ಮಕ್ಕಳ
ಬಿಸಿಯಪ್ಪುಗೆಯ ಪ್ರೀತಿಯುಸಿರ
ಹಿತವ ಆರಲು ಬಿಡಲಾರೆ

ಅಲ್ಲಿ ಇಲ್ಲಿ ಎಲ್ಲೆಲ್ಲೂ ಅಲೆಯುವಾಗ
ಪರಿಚಯವಾದ ಅಪರಿಚಿತರು ಚಿತ್ತವಲುಗಾಡಿಸಿ
ಹೊಸ ಚಿತ್ರ ಬಿಡಿಸಿ ನನ್ನೆದೆಯ ಬಗೆದು ಒಳ
ಹೊಕ್ಕು ಹಿತವಾಗಿ ಗೀಚಿ ಗಾಯ ಮಾಡಿ
ಕೆರಳಿಸಿ ಕೆರೆಯುವಂತೆ ಮಾಡಿ ಉಗುರು
ಸಂದಿಯ  ನೆತ್ತರು ಕಲೆಗಳ ಚೀಪಿದಾಗ
ನೆನಪಾಗಿ ನನ್ನ ನಾ ಪರಚಿಕೊಳಲು
ಪ್ರೇರೇಪಿಸುವ ಚಲುವೆಯರ ಮಧುರತೆಯ
ಮೀಟದಿರಲಾರೆ

ಸೋತಾಗ ಎಲ್ಲರೂ ಓಡಿ ಹೋಗಿ ಮೈದಾನದಲಿ
ಒಂಟಿಯಾಗಿ ಅಳುತ ನಿಂತಿರುವಾಗ ಓಡಿ ಬಂದು
ಧೈರ್ಯ ಹೇಳಿ ಮತ್ತೆ ಆಟ ಆಡಲು ಉತ್ತೇಜಿಸಿ
ಗೆದ್ದಾಗ ದೂರದ ಮೂಲೆಯಲಿ ನಿಂತು ಚಪ್ಪಾಳೆ
ತಟ್ಟಿ ಸಂಭ್ರಮಿಸುವ ನಿಷ್ಪ್ರಹ ಕೆಲವೇ ಕೆಲವು
ಗೆಳೆಯರ ಕೈ ಬಿಡಲಾರೆ

ಹೊಸ ಕನಸುಗಳ ಗಾಳ ಹಾಕಿ ಮೋಸ ಮಾಡಿ
ಕೈ ಕೊಟ್ಟು ಕೇಕೆ ಹಾಕಿ ಹೊಸ ಪಾಠಗಳನು
ದಯಪಾಲಿಸಿದವರನು ಹಿತಶತ್ರುಗಳು ಎಂದು
ಜರಿಯಲಾರೆ ದಟ್ಟ ಕತ್ತಲಲಿ ಕೈಬಿಟ್ಟು
ಚೀರಾಡಿಸಿ ಬೆಳಕಿನ ಮಹಿಮೆಯ ಸಾರಿದವರ
ಮರೆಯಲಾದೀತೇ ?

ಬಾಳ ಪಯಣದಲಿ ಭೇಟಿಯಾದ ಎಲ್ಲರೂ
ಎಲ್ಲರೂ ಭಿನ್ನ ವಿಭಿನ್ನ ಅಂತವರನು ದಕ್ಕಿಸಿಕೊಂಡ
ನಾ ನಿಜವಾಗಲೂ ಧನ್ಯ ಧನ್ಯ...

----ಸಿದ್ದು ಯಾಪಲಪರವಿ

ಕವಿತಾ

ಕಳವಳವ ದೂರಾಗಿಸುವ ಕವಿತಾ

ಲೆಕ್ಕವಿಲ್ಲದಷ್ಟು ಕಳವಳಗಳು
ನೂರೆಂಟು ಆತಂಕಗಳು
ಮನೋಮಂದಿರವ ಹೊಕ್ಕು
ಚಲ್ಲಾಟವಾಡುವ ಅರಗಿಣಿಗಳು
ಭಾವನೆಗಳ ಜೊತೆ ಕಣ್ಣಾ-ಮುಚ್ಚಾಲೆ
ಆಡುವ ಸಂಗತಿಗಳು

ಹತ್ತಿರವಾದಂತೆ ಭ್ರಮೆ ಹುಟ್ಟಿಸಿ
ಫಕ್ಕನೆ ಛಕ್ಕನೆ ದೂರಾಗಿ
ಬೆರಳು ತೋರಿಸಿ ಬೆರಗು ಹುಟ್ಟಿಸುವ
ಮಾಯಾಂಗನೆಯರು

ಹೆಣ್ಣು-ಹೊನ್ನು-ಮಣ್ಣು
ಮಾಯೆಯಲ್ಲ ಎಂದರಿಯುತ
ಮಾಯದ ಬಲೆಯಲಿ ಮತ್ತೆ
ಮತ್ತೆ ಸಿಕ್ಕು ಗಿರಕಿ ಹೊಡೆಯುವ
ಹೊತ್ತು ತಪ್ಪಿಸಿಕೊಳ್ಳಲಾಗದ
ಗಮ್ಮತ್ತು

ಮನದ ಮುಂದಣ ಆಸೆಗೆ
ನಿತ್ಯ ಪರಿತಪಿಸಿ ಹಪಾಹಪಿಸಿ
ಬಳಲಿ ಬೆಂಡಾದಾಗ

ಕೈ ಹಿಡಿದು ನಡೆಸಿ , ಕೈ ಕೊಟ್ಟವರ
ಮುಖವಾಡ ಕಳಚಿ ಅಂಗೈಯಲಿಟ್ಟು
ಭ್ರಮಾಲೋಕದ ಭೂತವ ಬಿಡಿಸಿ
ವಾಸ್ತವದಲೆಯ ನಡೆಸುವ
ಅಂದಗಾತಿ

ನೀ ನಿರದಿರೆ ನಿದಿರೆಯೂ ಬಹು
ದೂರ
ತೋಳ ದಿಂಬಾಗಿಸಿ ಬೆಚ್ಚಗೆ ಮುದದಿ
ಮಲಗಿಸುವ ನೀ ನಿತ್ಯ ನೂತನ
ಕಾವ್ಯ ಕನ್ನಿಕೆ...

----ಸಿದ್ದು ಯಾಪಲಪರವಿ

ನಾವೂ ಬಿಕ್ಷುಕರು

ಈಗ ನಾವೂ  ಬಿಕ್ಷುಕರು

'ಅಮ್ಮಾ ತಾಯೇ ಹತ್ತು ರೂಪಾಯಿ
ಚಿಲ್ರೆ ಕೊಡಿ ಖರ್ಚಿಗೆ ಬೇಕಾಗಿದೆ
ನನ್ನ ಹತ್ರ ಸಾವಿರ ರೂಪಾಯಿ ಇದೆ
ಚಿಲ್ರೆ ಕೊಡಿ ಬಿಳಿ ಮಾಡ್ಕೋತೀನಿ '
ಎಂಬುದು
ಸರತಿ ಸಾಲಿನ ಪಾಳೆಯದಲಿ
ಹಗಲು ರಾತ್ರಿ ಬ್ಯಾಂಕಿನ ಮುಂದೆ
ಆಕ್ರೋಶ

ಸತ್ಯದ ಆಳಗಲ ಅವರಿಗೂ ಇವರಿಗೂ
ಇಬ್ಬರಿಗೂ ಗೊತ್ತಿಲ್ಲ
ಕೊಡಿ ಖಂಡಿತಾ ಬಿಳಿಯಾಗಿಸುತ್ತೇನೆ
ಎಂಬ ಹುಸಿ ಕನಸು ಮಾರುವ ಕತ್ತಲೆ
ಖದೀಮರ ಕಹಳೆಗೆ ಬೆಚ್ಚಿಬಿದ್ದವರದು
ನಾಯಿಪಾಡು

ಬಿಸಿತುಪ್ಪದ ರುಚಿ ಅನುಭವಿಸಲಾಗದ
ಚಡಪಡಿಕೆಯಲಿಯೂ ಧನಿಕರಿಗೆ ಸಾವಿರ
ದಾರಿ ಸಾವಿನಿಂದ ಪಾರಾಗಲು
ನಿಶ್ಚಿಂತರವರು ಈ ಕರಾಳ ರಾತ್ರಿಯ
ಕಳವಳದಲೂ

ಕಾಲಪ್ರವಾಹದಲಿ ಕೊಚ್ಚಿ ಹೋಗುವ
ಇಲ್ಲವೇ ಸಿಕ್ಕು ನರಳುವ ಕರ್ಮ
ಕೇವಲ ಬಡಪಾಯಿಗಳಿಗೆ

ಸರತಿ ಸಾಲಿನಲಿ ನಿಂತವರಿಗೆ
ನೀರುಣಿಸುವ ಕುಹಕ ಉದಾರತೆಯ
ಕಾಳ ಧಣಿಗಳ ಮಸಲತ್ತುಗಳ ಅರಿಯದ
ಅಮಾಯಕರ ಮುಖದ ಮೇಲೆ
ಧಾರಾಕಾರ ಬೆವರು

ರಾಜಕಾರಣದ ಮಸಲತ್ತುಗಳ
ಆಳದಲಿ ಅಡಗಿರಬಹುದಾದ
ಉದ್ದೇಶವ ಅರಿಯುವದ ಮರೆತ
ಅಮಾಯಕರು

ದೇಶೋದ್ಧಾರದ ಸೋಗಲಾಡಿತನಕೆ
ನಿರಂತರ ಜಯಕಾರದ ಅಬ್ಬರದಲಿ
ಕಪ್ಪು ಹಣ ಸದ್ದಿಲ್ಲದೆ ಬೆಳಗಾಗುತ್ತಲೇ
ಇದೆ...

----ಸಿದ್ದು ಯಾಪಲಪರವಿ

ಆರ್ಥಿಕ ತಲ್ಲಣ

Financial Emergency ಹಾಗೂ ಸಾಮಾನ್ಯರ ತಲ್ಲಣಗಳು

ಕೈ ಖಾಲಿ ಆಗೋ ಅನುಭವ ನನಗೇನು ಹೊಸದಲ್ಲ. ಕಿಸೆಯಲ್ಲಿ ದುಡ್ಡಿಲ್ಲದೆ ಎಲ್ಲಂದರಲ್ಲಿ ತಿರುಗುವ ಸ್ವಭಾವ , ಈ ನಿಷ್ಕಾಳಜಿ ಸ್ವಭಾವದಿಂದ ಅನೇಕ ಮುಜುಗರಗಳನ್ನು ಎದುರಿಸಿದ್ದೇನೆ.
ವ್ಯಕ್ತಿ ಯಾವುದೇ ವೃತ್ತಿಯಲ್ಲಿದ್ದರೂ ತನ್ನ ಯೋಗ್ಯತೆಗೆ ತಕ್ಕಂತೆ ಆರ್ಥಿಕ ಶಿಸ್ತನ್ನು ರೂಪಿಸಿಕೊಂಡಿರುತ್ತಾನೆ. ಅದು ವ್ಯಕ್ತಿಯ ಸಹಜ ಗುಣಧರ್ಮವೂ ಹೌದು ।
  ನಾನು ಆ ಶಿಸ್ತನ್ನು ರೂಪಿಸಿಕೊಂಡಿಲ್ಲ ಎಂಬುದು ಹಿತೈಷಿಗಳ ಆರೋಪ , ಅದು ನಿಜವೂ ಹೌದಲ್ಲ !
ಈಗ್ಯಾಕೆ ಈ ಆತ್ಮರತಿ ಅಂತೀರಾ ?
ಮಧ್ಯಮ ವರ್ಗದ ಶಿಸ್ತಿನ ಜನ financial emergency ಯಿಂದ ತಲ್ಲಣಗೊಂಡು ತಮ್ಮ ರಕ್ತ ಸುಟ್ಟುಕೊಂಡು ನೋಟುಗಳ ಭಜನೆ ಮಾಡುವ ಈ ಹೊತ್ತಿನಲ್ಲಿ ನಾನು ಹಣವಿಲ್ಲದೇ ನಿಶ್ಚಿಂತನಾಗಿರಲು ನನ್ನ zero balance ಕಾರಣ ನನ್ನ ಈ ಅಶಿಸ್ತು ಈಗ ವರವಾಗಿರಬಹು ಎಂಬ positive ಭಂಡತನ ಇರಬಹುದಾ ?

ಈ ತಲ್ಲಣವನ್ನು ಒಂದು ಕ್ಷಣ ಗಂಭೀರವಾಗಿ ಆಲೋಚಿಸುವ ಅಗತ್ಯವೂ ಇದೆ. ಸಾವಿರಾರು ಕೋಟಿ ಕಪ್ಪು ಹಣ ಬಿಳಿ ಆಗುವುದು ಆ ದೇವರಿಗೆ ಗೊತ್ತು ಆದರೆ ಮಧ್ಯಮ ವರ್ಗದವರ ತಲ್ಲಣಕ್ಕೆ ಸರಿಯಾದ guidelines ಅಗತ್ಯವಿದೆ.

ಈ ಸಮಸ್ಯೆ ಎಷ್ಟು ದಿನ ?  ಜನಸಾಮಾನ್ಯರು even bank ನವರು confusion ನಲ್ಲಿದ್ದಾರೆ. ಜನಜೀವನ ಅಸ್ತವ್ಯಸ್ತವಾಗಿ ಸಣ್ಣಪುಟ್ಟ ಕೆಲಸ ಮಾಡುವವರು ಕೆಲಸ ಕಳೆದುಕೊಳ್ಳುವಂತಾಗಿದೆ. ಮಧ್ಯಮ ವರ್ಗದವರು ಅತೀ ಶ್ರೀಮಂತರ ನೆರವಿನಿಂದ ಪಡೆಯುತ್ತಿದ್ದ ಅನುಕೂಲಗಳಿಗೆ ತಡೆಬಿದ್ದಿದೆ.
ಅನೇಕ ಸ್ತಿತ್ಯಂತರಗಳನ್ನು ಸಮರ್ಥವಾಗಿ ಎದುರಿಸಿದ ನಾವು ಇದನ್ನೂ ಎದುರಿಸಬಹುದು ಎಂಬ ವಿಶ್ವಾಸ ಕೊಂಚ ಕ್ಷೀಣಿಸಿದೆ .
ಜನಸಾಮಾನ್ಯರ ಬಾಳು ತುಂಬಾ ಅಸ್ತವ್ಯಸ್ತವಾದರೆ ಆಗಬಹುದಾದ ರಾಜಕೀಯ ಪರಿಣಾಮಗಳು ಅಯೋಮಯ , ಇದು ಕೂಡಾ 'ಬಡವನ ಕೋಪ ದವಡೆಗೆ ಮೂಲ ' ಎಂಬಂತಾಗಿದೆ.

ಅತೀ ಶ್ರೀಮಂತರು , ಕಪ್ಪು ಹಣವುಳ್ಳವರು ಮೇಲ್ನೋಟಕ್ಕೆ silent ಆಗಿ ಕಾಣಿಸುತ್ತಾರೆ ಆದರೆ ಮಧ್ಯಮ ವರ್ಗದವರ ಸಪ್ಪಳ ಜೋರಾಗಿ ಕೇಳಿಸುತ್ತಿದೆ ಇದಕ್ಕೆ ನೀವೇನಂತೀರಿ ?

    ----ಸಿದ್ದು ಯಾಪಲಪರವಿ

ಮೊಬೈಲ್ ಎಡವಟ್ಟು

ಮತ್ತೊಂದು ಮೊಬೈಲ್ ಎಡವಟ್ಟು

ಸಾರ್ವಜನಿಕ ಬದುಕು ಯಾಕೋ ಹಳಿ ತಪ್ಪುತ್ತಲಿದೆ. ಅಧಿಕಾರದಲ್ಲಿರುವವರು ಸಾರ್ವಜನಿಕ ಬದುಕಿನಲ್ಲಿ ತುಂಬಾ ಎಚ್ಚರಿಕೆಯಿಂದಿರಬೇಕು.
ಜನರು ಕೂಡಾ ತುಂಬಾ ನಿರೀಕ್ಷೆ ಇಟ್ಟುಕೊಂಡು ಮಂತ್ರಿ -ಮಹೋದಯರ ಖಾಸಗಿತನ ಕಿತ್ತುಕೊಳ್ಳುತ್ತಾರೆ ಹಾಗಂತ ಸಂಯಮ ಕಳೆದುಕೊಳ್ಳಬಾರದು. ಜನರ ಮಧ್ಯೆ ಹಾಗೂ ಸಭೆ ಸಮಾರಂಭಗಳಲ್ಲಿರುವಾಗ ಮೈ ಮರೆಯಬಾರದು. ಸುತ್ತಲೂ ಅಸಂಖ್ಯ ಕಣ್ಣುಗಳು, ಕ್ಯಾಮೆರಾಗಳು ಕುತೂಹಲದ ನಿಗಾ ಇರುತ್ತದೆ  ಎಂಬ ಅರಿವಿರಬೇಕು.
ಪ್ರೀತಿಪ್ರೀತಿ-ಪ್ರೇಮ-ಪ್ರಣಯ ಎಲ್ಲರ ಆಸಕ್ತಿ , ನೋಡೋದು ಇತ್ಯಾದಿ ಸರಿಯಲ್ಲ ಅಂತ ಹೇಳೋ ಅಧಿಕಾರ ಯಾರಿಗೂ ಇಲ್ಲ ಆದರೆ ಸಾರ್ವಜನಿಕ ಜವಾಬ್ದಾರಿ ಇರುವುವವರು ಅನೇಕ ಖಾಸಗಿ ತೆವಲುಗಳನ್ನು ಸಹಿಸಿಕೊಳ್ಳಬೇಕು .
ಅಧಿಕಾರದ ಮದದಲ್ಲಿ ಇತಿಹಾಸವನ್ನು ಮರೆತು ಮಾಡಿದ ತಪ್ಪನ್ನೇ ಮಾಡುತ್ತಾರೆ.
ಈಗ history has repeated , ಪಕ್ಷ ಬೇರೆ ಅಷ್ಟೆ ಆದರೆ ಪ್ರಮಾದ ಒಂದೇ, ಇತಿಹಾಸದಿಂದ ಪಾಠ ಕಲಿಯದೇ ಅನಾಹುತ ಮಾಡಿಕೊಂಡಿದ್ದಾರೆ.
----ಸಿದ್ದು ಯಾಪಲಪರವಿ

ನಗುತಲಿರೋಣ

ನಗುತಲಿರೋಣ

ಸೋಲಿಗಾಗಲಿ ಗೆಲುವಿಗಾಗಲಿ
ನಗೆಯ ಕಸಿದುಕೊಳ್ಳುವ
ಅಧಿಕಾರ ನೀಡದೇ
ನಗುತಲಿರುವುದೇ ಜೀವನ.
ಗೆದ್ದರೆ ಅಸೂಯೆಯ ಮಾಯೆ
ಸೋತರೆ ಅನುಕಂಪದ ಛಾಯೆ
ನಗುತ ನಗಿಸುತ ಬಾಳುವ
ಹಂಗಿಲ್ಲದ ಸಿರಿಮನದ
ಅರಮನೆಯಲಿ.
----ಸಿದ್ದು ಯಾಪಲಪರವಿ

ಬಿಡಲಿಲ್ಲ

ಹೀಗೊಂದು ಕ್ಷಣ
ಎಷ್ಟೊಂದು ಆಹ್ಲಾದಕರ
ನನ್ನ ತೋಳ ಮೇಲಿನ
ನಿನ್ನ ಗಾಢ ನಿದ್ರೆ ಯ ಸದ್ದು
ಏರಿಳಿತದ ಉಸಿರು ಒಮ್ಮೆ
ಪ್ರೀತಿ ಸೆಲೆ ಹರಿಸಿದರೆ ಮತ್ತೊಮ್ಮೆ
ಕಾಮದಲೆ ಚಿಮ್ಮಿಸುತದೆ
ಪ್ರೇಮ ಕಾಮದ ಸವಿ ಸುಖ
ನೀ ನಿದಿರೆಯಲಿದ್ದಾಗಲೂ
ಬಿಡಲಿಲ್ಲವಲ್ಲ
ಎನ್ನ ಕಾಡುವದ!

ಬಾ

ಬರುವದಿದ್ದರೆ ಬೇಗ
ಬಾ
ಇಲ್ಲದಿದ್ದರೆ ಬೇಗ
ಹೋಗು
ಸುಮ್ಮನೇ ಸತಾಯಿಸಿ
ಆಟ ಆಡಬೇಡ.

ಬೇಡವೇ ಬೇಡ

ಬೇಡವೇ ಬೇಡ

ಅದ್ಧೂರಿ ಮದುವೆಗಳು
ಐಷಾರಾಮಿ ಬಂಗಲೆಗಳು
ಹರಾಮಿ ಆಚರಣೆಗಳು
ಅಸಹ್ಯ ವಾದಗಳು
ಅನಾರೋಗ್ಯ ಚರ್ಚೆಗಳು
ವೈಯಕ್ತಿಕ ನಿಂದನೆಗಳು
ಸೊಟ್ಟ ಸೆಲ್ಫಿಗಳು
ಕೆಟ್ಟ ಜಯಂತಿಗಳು
ನಮ್ಮನ್ನು ಇಷ್ಟೊಂದು
ಹೀನಾಯವಾಗಿ
ಆಳುವಷ್ಟು ನಾವು
ಬೌದ್ಧಿಕ ದಿವಾಳಿಯಾಗಿ
ಬಟ್ಟ ಬಯಲಲಿ ಬೆತ್ತಲಾಗಿ
ಓಡಾಡುವ ಸ್ಥಿತಿ ತಲುಪಲು ಕಾರಣ
ಏನಿರಬಹುದು ?
----ಸಿದ್ದು ಯಾಪಲಪರವಿ

ಮೌನದ ಮಾತು

ಮೌನದ ಮಾತು

ಆಳವಾದ ದಿವ್ಯ ಮೌನ
ಅನೇಕ ಹೊಳಹುಗಳನ್ನು
ಹುಟ್ಟು ಹಾಕುತ್ತದೆ.
ಒಳಗಣ್ಣು ತಾನೇ
ತಾನಾಗಿ ತೆರೆದುಕೊಳ್ಳುತ್ತದೆ.

ಕಾಡು ಹರಟೆ , ನಕಾರಾತ್ಮಕ
ವ್ಯಕ್ತಿಗಳು ನಮಗರಿವಿಲ್ಲದಂತೆ
ನಮ್ಮ ನೆಮ್ಮದಿಯನ್ನು
ಕಿತ್ತುಕೊಂಡು ಬಿಡುತ್ತಾರೆ.

ಕೆಲವೊಮ್ಮೆ ಮೌನದ
ಮಾತುಗಳನ್ನು
ಆಲಿಸಬೇಕು
ಆಗ ಮೌನ ಜೋರಾಗಿ
ಮನಬಿಚ್ಚಿ ಮಾತನಾಡಿ
ಮಾರ್ಗದರ್ಶನ
ಮಾಡುತ್ತದೆ.

ಎಲ್ಲವನ್ನು ಖಾಲಿ ಮಾಡಿಕೊಂಡು
ನಿಶ್ಯಬ್ದವಾಗಿ ಮೌನದ
ಮಾತುಗಳನ್ನು ಆಲಿಸೋಣ...
----ಸಿದ್ದು ಯಾಪಲಪರವಿ

ಜಗದ ಕಣ್ಣು

ಜಗದಣ್ಣ ಮುಗಿಲ ಕಣ್ಣ

ಸೂರ್ಯ ದೇವ ನಿನಗ
ಸಂಜೀ ಮುಂದಿನ
ಶರಣುಗಳು.
ನೀನಿಲ್ಲದೆ ನೀ
ನಿಲ್ಲದೆ
ಈ ಜಗಕಿಲ್ಲೋ
ಅಣ್ಣ ಬೆಳಕು
ಗೋಧುಳಿಯ
ಮುಸ್ಸಂಜಿಯ ಸಂಭ್ರಮಕ
ನಾ ನಗದಿರಲಾದೀತೇನಣ್ಣ
ನೀ ನಕ್ಕಂತೆ ನಾ
ನಗದಿದ್ದರ ಹೆಂಗೋ ಅಣ್ಣ
ಅತ್ತರೂ ಸತ್ತರೂ
ಕೇಳುವರ್ಯಾರೋ
ನಿನ್ನ ನೋವ
ಬರಬೇಕು ನೀ ಜಗವ
ಬೆಳಗೋ ಕಣ್ಣಾಗಾಕ
ನಿನ್ನ ನೋಡಿ ಕಲಿಯಾಕ
ಬೇಕು ನಸು ನಗುವುದ
ಅಳುನುಂಗಿ
ನುಂಗಿ ನುಂಗುತ
ನಗಬೇಕಲ್ಲೋ
ಜಗದಣ್ಣ...
----ಸಿದ್ದು ಯಾಪಲಪರವಿ

ದೀಪಾವಳಿ -1

ದೀಪಾವಳಿ

ಭರವಸೆಯ ಮೂಟೆ ಹೊತ್ತು
ಸಾಗುತಿದೆ ಜೀವ ಪಯಣ
ದೀಪದಿ ದೀಪ ಹಚ್ಚುತ
ಕತ್ತಲೆ ಕಳೆದಂತೆ .
ಒಮ್ಮೆ ಸಂಕ್ರಮಣ
ಮಗದೊಮ್ಮೆ ಹೋಳಿ
ಮತ್ತೆ ಯುಗಾದಿ ಸಡಗರ
ಈಗ ದೀಪ ಹಣತೆಯ
ಸಾಲುಗಳ ದಿಬ್ಬಣ.
ಬದುಕ ಕತೆಯೂ ಹಬ್ಬಗಳಂತೆ
ಅದಲು ಬದಲು
ಸಿಹಿ ಕಹಿ ಗಳ ಮಧುರ ಮಿಲನ.
ಕತ್ತಲೆಯಲಿ ಬೆಳಕ ಹಚ್ಚೋಣ
ಇರುಳಲಿ ಹಗಲ ಹುಡುಕೋಣ
ಬೆಳಕ ಸಂಭ್ರಮದಿ ಕತ್ತಲ ಮರೆಯದಿರೋಣ
ನಿದ್ರೆ ಯಲಚ್ಚರದಿ
ಮೌನದಲಿ ಶಬ್ದಗಳ ಹುಡುಕುತ
ಬಂದುದನೆದುರಿಸಿ ಸಂತಸದಿ
ಕಾಲದ ಬಂಡಿ ಸಾಗಿಸೋಣ
    ---ಸಿದ್ದು ಯಾಪಲಪರವಿ

ದೀಪಾವಳಿ

ದೀಪಾವಳಿ ಬೆಳಕ ತರಲಿ ಹೊರಗು ಹಾಗೂ ಒಳಗೂ

ಸಕಾರಾತ್ಮಕ ಬೆಳಕು
ಎಲ್ಲೆಡೆಯೂ ಇರಲಿ
ವೈದ್ಯರು ದೇಹ ತೂಕ
ಬ್ಯಾಂಕರುಗಳು ಸಾಲ
ಇಳಿಸಲು ನೀಡುವ
ಸಲಹೆಗಳ ಪಾಲಿಸುವ
ಪಾಲಸಿ ಇರಲಿ

ಜ್ಞಾನದ ಹರವು ಒಳಗೂ
ಹೊರಗೂ ವಿಸ್ತಾರವಾಗಲಿ
ಸಕಾರಾತ್ಮಕ ಬಳಗ ಎಲ್ಲೆಡೆ
ವ್ಯಾಪಿಸಲಿ
ನಕಾರಾತ್ಮಕ ಸಂದೇಹಗಳು
ದೂರಾಗಿ ಆತ್ಮವಿಶ್ವಾಸದ
ಕಹಳೆ ಮೊಳಗಲಿ

ಮತ್ತೆ ಮತ್ತೆ ಬರುವ
ದೀಪಾವಳಿ ಬೆಳಕು
ಮನದ ಕತ್ತಲೆಯ
ಮುಕ್ತಗೊಳಿಸಲಿ

ಹಾರೈಕೆ ಸಂಕಲ್ಪವಾಗಿ
ಪರಿವರ್ತನೆಗೊಳಲಿ

ಬಯಕೆಗಳು ಹಿತ
ಮಿತಗೊಂಡಾಗ
ಬೆಳಕು
ನೆಲೆಗೊಳ್ಳಲಿ

ದೀಪಾವಳಿ ನಿತ್ಯ
ಝಗಮಗಿಸಲಿ
ನಿತ್ಯವೂ ಹಬ್ಬ
ನಮ್ಮ ಪಾಲಿಗಿರಲಿ

ದೀಪಾವಳಿ ಹಬ್ಬದ
ಸಂಕಲ್ಪಗಳು ನಿತ್ಯ ಬೆಳಗಲಿ

ಇಂದು ರಾತ್ರಿ ಎಂದಿನಂತೆ

ಇಂದು ರಾತ್ರಿ ಎಂದಿನಂತೆ

ಇಂದು ಈ ರಾತ್ರಿಯೂ ಎಂದಿನಂತೆ ಇದೆ
ಅತ್ತ ಭಯಾನಕವೂ ಅಲ್ಲದ ಸುಖವೂ
ಇಲ್ಲದ ಏನೋ ಹುಡುಕಾಟದ ಹುಡುಕಾಟಿಕೆ

ಕಳ್ಳರು ಎಚ್ಚರಾಗಿದ್ದಾರೆ ಮಲಗುವದ
ಕಾಯುತ್ತ
ಸಿರಿವಂತರೂ ಎಚ್ಚರಾಗಿದ್ದಾರೆ ಕಳ್ಳರ
ಹಾಗೆ ಮತ್ತಿಷ್ಟು ಸಿರಿವಂತರಾಗುವ ಹೊಂಚು
ಹಾಕುತ್ತ

ಎಲ್ಲರೂ ಕಳ್ಳ -ಮಳ್ಳರು ಈ ರಾತ್ರಿಯ
ಕಣ್ಣೊಳಗೆ.

ನಶೆ ಏರಿಸಿಕೊಂಡವರು ಏನನ್ನೋ
ಬಡಬಡಿಸುತ್ತ ನಿಚ್ಚಳಾಗಿದ್ದೇವೆ ಎಂದು
ಸಾಬೀತು ಪಡಿಸಲು ಹವಣಿಸುತ್ತಾರೆ

ಹರೆಯದವರು ಬೆದೆಗೆ ಬಂದ ಗೂಳಿಗಳ
ಹಾಗೆ ಕಾದಾಡಿ ಕಾಮಿಸುವ ಜಪ
ಮಾಡುತ್ತಾರೆ

ಇನ್ನು ಕೆಲವರಿಗೆ ಉದ್ರೇಕಗೊಳ್ಳದಿರುವ
ಆತಂಕದ ಅವಮಾನದಲಿ ಸುಖಿಸಿ
ಇನ್ನೂ ಇದೆ ಎಂದು ಸಾಧಿಸುವ ಧಾವಂತ

ವಿರಹ ವೇದನೆಗೆ ನೂರಾರು ದಾಳಿಗಳು
ಮೈಮನಗಳ ಸುಳಿಯಲಿ ಲೆಕ್ಕವಿಲ್ಲದಷ್ಟು
ತಿರುಗುಣಿಗಳು
ಕಳಕೊಂಡವರು ಹೇಗಾದರೂ ಮಾಡಿ
ಪಡೆದೇನು ಎಂಬ ಭ್ರಮಾನಂದ

ತಿಣುಕಾಡಿ ಕೊಸರಾಡಿದರೂ ಎಚ್ಚರಗೊಳ್ಳದ
ಪುರುಷತ್ವ
ಆದರೂ ಎಲ್ಲವೂ ಸರಿ ಇದೆ ಸ್ವಲ್ಪ ಎಡವಟ್ಟು
ಎಂಬ ಸಮಜಾಯಿಷಿ

ಪ್ರೀತಿ-ಪ್ರೇಮ-ಪ್ರಣಯಗಳ ನೂರು
ಸುತ್ತಿನ ನಿಲ್ಲದ ಇನ್ನಿಲ್ಲದ ಪಯಣ

ಹಗಲುಗನಸಿನ ಸವಾರಿಯಲಿ ದಣಿದ
ದೇಹ ಜಪ್ಪನೆ ಮಲಗಿದರೂ ಬಿಡದ
ಕನಸುಗಳು

ಮುಲುಕಾಟ ಕುಲುಕಾಟದ ಕಲರವಕೆ
ನೀರವ ಮೌನದಬ್ಬರ
ನಲುಗುವ ದೇಹ ಹಿಂಡಿ ಹಿಪ್ಪಿಯಾದರೂ
ಸುಖದ ಮೇಲಾಟ

ಹಗಲಿನಲಿ ಊಹಿಸಲಾಗದ
ನಿಲುಕಲಾಗದ ಸಂಗತಿಗಳ ಗಾಳಕೆ
ಬೀಳಿಸುವ ಹರಸಾಹಸ

ಎಂದೆಂದೂ ನಿಲುಕಲಾಗದ ಆಗಸದಲಿ
ತೇಲಾಡುವ
ನಕ್ಷತ್ರಗಳ ಗುಣಿಸಿ ಎಣಿಸಿ ಗುಡ್ಡೆ ಹಾಕುವ
ಮಾಯಾಲೋಕ

ಹಗಲು ಸನ್ಯಾಸದ ವೇಶಗಳು
ವೇಗದಲಿ ಕಳೆದು ಕಾದಾಡಲು
ಕಾದಿರುವ ಸವಿ ಗಳಿಗೆ
ಒಮ್ಮೆ ಮೈ ಹಗುರಾಗಿಸಿ
ತೇಲಾಡುವ ಮಹದಾನಂದ

ಮುಖಕ್ಕೆ ಅಂಟಿದ ಮುಖವಾಡಗಳು
ರಪ ರಪನೆ ಉದುರಿ ಮುಖದರ್ಶನದ
ಲಿಲಾವುಗಳ ಲೀಲೆ
ಕದ್ದ ಮಾಲಿಗೆ ಲೆಕ್ಕ ಕೊಡುವ
ನಾಟಕ

ಅಶ್ಲೀಲ ಲೋಕದ ಝಗಮಗ
ಝೇಂಕಾರ
ನಿರ್ಲಜ್ಯ ಲೋಕದ
ರಂಭೆ-ಊರ್ವಶಿಯರೊಂದಿಗೆ
ಬೆತ್ತಲೆ ಕುಣಿದು ಬಯಲಾಗುವ
ಬಯಕೆಗೆ ಶುಭ ಮುಹೂರ್ತ

ಇಂದು ರಾತ್ರಿ ಎಂದಿನಂತೆ
ಒಬ್ಬೊಬ್ಬರಿಗೆ ಒಂದೊಂದು
ಲೋಕದಂತೆ ಇದು ನಿತ್ಯವೂ
ನಿಲ್ಲದ ಜಾತ್ರೆ
ಮುಗಿಯುವವರೆಗೆ ಈ
ಜೀವನ ಯಾತ್ರೆ.

----ಸಿದ್ದು ಯಾಪಲಪರವಿ

ಹದ ಇದ್ದಾಗ

ಹದ ಇದ್ದಾಗ ಕದ ತಗೀಬ್ಯಾಡೋ

ಹದವಿದ್ದಾಗ ಕದ ತೆರೆದು
ಮುದವಾಗಿ ಬೆರೆತು ಜೋರಾಗಿ
ಗುದ್ದಿದ ಗೂಳಿಗಳ
ಮರೆಯುವದಾದರೂ ಹ್ಯಾಂಗ

ನಸು ನಗುತ ನುಸುಗುನ್ನಿಗಳ
ಹಾಂಗ ಮೈ ಮ್ಯಾಲ ನಲಿದು
ಕುಣಿದು ಕುಪ್ಪಳಿಸಿ
ಎದಿ ಮ್ಯಾಲಿನ ಕೂದಲಿನ್ಯಾಗ
ಸಣ್ಣಗ ಬೆರಳಾಡಿಸಿ ನುಣ್ಣಗ
ಮಾಡಿ

ಎದೀನ ಹರಗಿ ಹದಗೊಳಿಸಿ
ಪ್ರೀತಿ ಪ್ರೇಮಗಳ ಬೀಜ ಬಿತ್ತಿ
ಒಲವಿನ ನೀರ ಹರಿಸದ
ಭಾವನೆಗಳ ಬತ್ತಿಸಿದವರ

ಕಣ್ಣ ಕಾಂತಿಯನು
ಗುಳಿ ಕೆನ್ನೆಯನು ಸವರಿ
ಮುತ್ತಿಟ್ಟು ಕಚಗುಳಿ ಇಟ್ಟವರ

ಮೈಯಾಗ ನೆರಿ ಹಾವಳಿ
ಎಬ್ಬಿಸಿ ಸೊಕ್ಕನು ಉಕ್ಕಿ ಹರಿಸಿ
ಬೆಚ್ಚಿ ಬೀಳುವಂತೆ ಮಾಡಿದವರ
ನಾ
ಮರೆಯುವದಾದರ ಹ್ಯಾಂಗ

ತಮ್ಮ ಪಾಲಿನ ಸುಖಾನ
ಚಪ್ಪರಿಸಿ ಸವಿದು ರಸವ  ಹಿಂಡಿ
ಹೀರಿ
ಹಿಪ್ಪೆ ಮಾಡಿ ಕಸುವು ಕಳಕೊಂಡ ಈ
ಹೊತ್ತು
ಮರೆಯುವದಾದರೂ ಹ್ಯಾಂಗ

ನಿಮ್ಮ ಎದಿಯಾಗಿನ ಕಿಚ್ಚು
ಹೊತ್ತಿ ಉರಿದು ಹವಣಿಸಿದಾಗ
ನನ್ನ ಎದಿ ಕದ ಬಡಿದರ ಮತ್ತ
ಸಿಕ್ಕು ಮತ್ತು ಬರಿಸುವ ಊರ
ಹುಚ್ಚ ಖೋಡಿ ನಾ
ನಲ್ಲ

ಮುಚ್ಚೀನಿ ಈಗ ನಾ
ಕದ ನಿಮ್ಮಂತ ಊರ
ಹಕನಾಕ ಮಂದೀಯ
ನಂಜಿಗೆ ಅಂಜಿ

ಹದ ಇದ್ದವರಿಗೆ ಕದ
ತಗೀಬ್ಯಾಡೋ ತಿರಬೋಕಿ
ತಮ್ಮಾ ಅಂದವರ ಮಾತ
ಮರೆಯುವದಾದರೂ ಹ್ಯಾಂಗ.
----ಸಿದ್ದು ಯಾಪಲಪರವಿ

ನಾ ಕಾಣೆ

ಅನಿರೀಕ್ಷಿತವಾಗಿ ತಲೆಯಲ್ಲಿ
ಹೊಕ್ಕ
ಹೊಸ ಆಸೆ ನಿದ್ದೆಯನ್ನು
ಕಸಿದುಕೊಂಡು ಕಸಿವಿಸಿ
ಆಗುತ್ತದೆ ಎಂದು
ಗೊತ್ತಿದ್ದರೂ ಹೊಸ
ಆಸೆ ಯಾಕೋ ನಾ
ಕಾಣೆ
ನಿನಗೇನಾದರು
ಗೊತ್ತಾ ?

----ಸಿದ್ದು ಯಾಪಲಪರವಿ

ಜಾರಿ ಬೀಳಲಿಲ್ಲ

ಜಾರಿ ಬೀಳಲಿಲ್ಲ

ಕೆಲವು ಕ್ಷಣ ಖುಷಿ
ಕೊಟ್ಟು ಕಚಗುಳಿ ಇಟ್ಟು
ಅಲ್ಲಲ್ಲಿ ಕಚ್ಚಿ ಒಂಚೂರು ಹಿತವಾದ
ಗಾಯ ಮಾಡಿ ಒಂದಿಷ್ಟು ಹೇಳ
ಬಾರದನ್ನ ಹೇಳಿ ಎಲ್ಲವನ್ನೂ ಕೇಳಿ
ಹೋದದ್ದು ಒಳ್ಳೆಯದೇ

ಈಗ ನಾ ಅಪರಾಧಿ ಅಲ್ಲವೇ
ಅಲ್ಲ ಹಸಿದಿದ್ದರೂ ಗಬ ಗಬ
ತಿನ್ನಲಿಲ್ಲ ಎಲ್ಲ ಏನೆಲ್ಲ ಎದುರಿಗೆ
ಬಟ್ಟ ಬಯಲು

ಆದರೂ ಗಡಬಡಿಸಿ
ಬಡಕೊಂಡು ಬಾಯಿ
ಹಾಕಲಿಲ್ಲ ಕೈ
ಹಚ್ಚಲಿಲ್ಲ ಮನದ
ಮೂಲೆಯಲೊಂದು
ಅನುಮಾನ ಕಾಡಿ ಕನವರಿಸುತಿತ್ತು
ಒಳಗಣ್ಣು ಬೇಡ ಇದು
ನಿನ್ನದಲ್ಲ ಎಂದು ಎಚ್ಚರಿಸುತಿತ್ತು

ಮೈಮನಗಳ ಮೂಲೆಗೊತ್ತಿ ದೂಡಿ
ಒಳಗಣ್ಣನಾಲಿಸಿ ಲಾಲಿಯ ಕೇಳಿ
ಎಚ್ಚರಾಗಿ ಬೆಚ್ಚಿ ಬಿದ್ದು ನನ್ನ
ಸಂಯಮಕೆ ಸ್ವಯಂ
ಬೆರಗಾದೆ

ಎಲ್ಲಂದರಲ್ಲಿ ನುಸುಳಿ
ಸುಳಿದಾಡದೇ ಸಹನೆಯಲಿ
ನೆಲೆ ನಿಂತು ಮತ್ತೊಮ್ಮೆ
ಉ ಹೂಂ ಊಹೂಂ ಇದು
ನನಗೆ ಈಗ ಈ ಕ್ಷಣದಲಿ
ಭಾವಾವೇಶಕೆ ಒಳಗಾಗಿ ಒಳ
ಸುಳಿದು ಬರಸೆಳೆದರೂ ಕೈ
ಜಾರುವ ಮೀನಿದೆಂಬುದ
ಮನಗಂಡು ಅಲ್ಲಿಯೇ ಮುದುಡಿದೆ

ಎಲ್ಲವೂ ವಿಧಿಯಾಟದ ಮಹಿಮೆ
ಯಲಿ ಜಾರಿ ಬೀಳಲಿಲ್ಲ

ಸಾಕೀಗ ದಡದಲಿ ನೆಮ್ಮದಿಯ
ಉಸಿರ ಬಿಟ್ಟು ಮತ್ತೆ
ಆತ್ಮಾವಲೋಕದಲಿ
ನೆಲೆಗೊಂಡುಬಿಟ್ಟೆ...

----ಸಿದ್ದು ಯಾಪಲಪರವಿ

ಸೀತೆಯಲ್ಲ

ನಾ
ಪದೇ ಪದೇ
ಅಗ್ನಿ ಪರೀಕ್ಷೆಗೆ
ಒಳಗಾಗಲು
ರಾಮಾಯಣದ
ಸೀತೆಯಲ್ಲ
ನೀ
ರಾಮನೂ
ಅಲ್ಲ.

----ಸಿದ್ದು ಯಾಪಲಪರವಿ