Saturday, February 3, 2018

ಮಾಡು-ಬಿಡು ಗೊಂದಲ ಬಿಡು

*ಮಾಡು-ಬಿಡು ಗೊಂದಲ ಬಿಡು*

ಎಲ್ಲವೂ ಸತ್ಯ ಎಲ್ಲವೂ ಮಿಥ್ಯ
ಹೌದಾದದ್ದು ಅಲ್ಲಾಗಿ ಅಲ್ಲಾದದ್ದು
ಹೌದಾಗುವ ಹೊತ್ತಲಿ ಇನ್ನಿಲ್ಲದ
ಗೊಂದಲ ಬೇಕು-ಬೇಡಗಳ ಜೀಕಾಟ

ಬೇಕು ಬೇಕು ಎಲ್ಲವೂ ನನಗೇ ಬೇಕು
ಮತ್ತೊಮ್ಮೆ ಬೇಡ ಏನೂ ಬೇಡ
ಮಗದೊಮ್ಮೆ ಬೇಕೆಂಬ ಸೊಲ್ಲು

ಬೇಕಾದರೆ ಹಿಡಿ ಬೇಡವಾದರೆ
ನಡೆ ನೂರು ಮಾರು ದೂರ
ಕಾಯಲು ಅವನುಂಟು
ನೋಡುವ ಎಲ್ಲವ ಎಡೆಬಿಡದೆ

ಯೋಗ-ಧ್ಯಾನ ಓದು-ಬರಹ
ಪ್ರೀತಿ-ಪ್ರೇಮ
ಎಲ್ಲವೂ ಅವನು ತೊಡಿಸಿದ ಉಡುಗೆ

ಬೇಡವಾದರೆ ಕಳೆದು
ಬೆತ್ತಲಾಗಿ ನಿಶ್ಚಿಂತವಾಗು
ಇಲ್ಲಿ ಇಲ್ಲ
ಯಾರೂತಡೆದು ಹಿಡಿದು
ಕಟ್ಟಿ ಹಾಕಿ ಸಲಹಲು

ಮಾಡುವುದಾದರೂ ಏನಿದೆ
ಇಲ್ಲಿ?

ಹೋಗಲೇಬೇಕಲ್ಲ
ಒಮ್ಮೆ ಎಲ್ಲ ಮುಗಿದ ಮೇಲೆ

ಅವಕೊಟ್ಟ ಒಲುಮೆಯ ಬಿಟ್ಟು
ಬೇರೇನು ಬೇಕು?

ಧ್ಯಾನದ ಉಸಿರಲಿ ಓದಿನ ಹರವಲಿ
ಬರಹದ ಕಂಪಲಿ ಪ್ರೀತಿಯ ಸನಿಹದಿ
ಇರುವ ಸವಿಯಲಿ ಇದ್ದು ಸುಖಿಸು

ಬೇಡವಾದರೆ ಇರು ಅಲ್ಲಿ ಇಲ್ಲಿ
ಇನ್ನೆಲ್ಲೋ ಗೊತ್ತು ಗುರಿ ಇಲ್ಲದ

ಗುರು ಇಲ್ಲದ ಗೊಂದಲದ
ಗೂಡಲಿ

ಬೇಡ ಎನಲು

ನಾ
ಯಾರು
ಕೇಳಲು
ನೀ
ಯಾರು

ಮಾಡು ಖುಷಿ ಕೊಡುವ
ಕೆಲಸಗಳ ಕೇವಲ ನೀ
ನಿನಗಾಗಿಯೇ

ಮಾಡುತಲೇ ಇರು
ಕೊನೆಯ ಉಸಿರು
ನಿಲ್ಲುವ
ತ
ನ
ಕ.

-----ಸಿದ್ದು ಯಾಪಲಪರವಿ.

ಓಲೆ-೨೧


ಒಲವಿನೋಲೆ-೨೧

ಹಲೋ ಚಿನ್ನು,

*ಮನಸಿನ ಭ್ರಾಂತು*

*ನಾನು ತುಂಬ important,ನಾನು ಹೋದರೆ ಏನೂ ನಡೆಯುವುದಿಲ್ಲ, ಮನೆಯವರು, ಆಫೀಸಿನ ಜನ ತುಂಬಾ miss ಮಾಡಿಕೊಳ್ತಾರೆ* ಹೀಗೆ ಏನೇನೂ ಹೇಳುವುದು ತುಂಬಾ meaningless, ಅನರ್ಥ ಬಡಾಯಿಯಲ್ಲದೆ ಇನ್ನೇನು?

ನಾವು ನಮ್ಮನ್ನು ನಂಬಿದವರ ಬದುಕಿನ ಭಾಗವಾಗಿರುವ ಮಾತ್ರಕ್ಕೆ *ನಾನು* ಅನಿವಾರ್ಯ ಎಂಬ ಮನಸ್ಥಿತಿ ಹೊಕ್ಕಿರುತ್ತದೆ.

ಅಕಸ್ಮಾತ್ ಅನಾರೋಗ್ಯಕ್ಕೆ ಒಳಗಾಗಿ ಹಾಸಿಗೆ ಹಿಡಿಯಿರಿ ನೋಡೋಣ ? ಎಲ್ಲವೂ ಮಂಗ ಮಾಯ.

ಆಗ ಬೇರೆ ವರಸೆ ಶುರು. ' ಏನೇ ಹೇಳಿ ಸರ್ ಹೆಲ್ತ್ ಮಹತ್ವದ್ದು, ಮಾಡುವಾಗ ಎಲ್ಲರೂ ಮಾಡಿಸಿಕೊಳ್ತಾರೆ, ಈಗ ನೋಡಿ ಎಲ್ಲರೂ ನಾಪತ್ತೆ.'

ಹೀಗೆ ಕಾಲ ಕಾಲಕ್ಕೆ ನಾವೇ ಹೇಳುವ ಮಾತುಗಳು ಮೌಲ್ಯ ಕಳೆದುಕೊಂಡು ನಮಗೆ ತಮಾಷೆ ಎನಿಸುತ್ತವೆ.

ನಾವು ಬರೀ ನೆಪ‌, ಅನಿವಾರ್ಯ ಎಂಬ ಭ್ರಮೆ.

ಬೇರೆಯವರಿಗಾಗಿ ನಿಸ್ವಾರ್ಥದಿಂದ ಕೆಲಸ ಮಾಡುವ ಗುಣಧರ್ಮ ಇರಲಿ ಆದರೆ ನಾನೇ ಎಲ್ಲಾ ಎಂಬ ಅವಾಸ್ತವ ಬೇಡ.

ಮಾಡುವ ಕೆಲಸ ನಮಗೆ ಸರಿ ಅನಿಸಿ ಖುಷಿ ಕೊಡಲಿ, ಇಲ್ಲ ಅದು ನಮ್ಮ ಪಾಲಿನ ಅನಿವಾರ್ಯ ಕರ್ತವ್ಯವಾಗಿರಲಿ , ನಿಷ್ಠೆಯಿಂದ ಮಾಡೋಣ.

ಆದರೆ ನಾನು ಹೋದರೆ ನಡೆಯೋದೇ ಇಲ್ಲ ಎಂಬ ಕಾರಣ ಇಟ್ಟುಕೊಂಡು ನಮಗೆ ದಕ್ಕಿದ ಅವಕಾಶಗಳನ್ನು ಕಳೆದುಕೊಳ್ಳುವುದು ಬೇಡ.

ಒಳ್ಳೆಯ ಪುಸ್ತಕ, ಇಂಪಾದ ಸಂಗೀತ, ಬರೆಯುವ ಕಥೆ, ಹಾಡುವ ರಾಗ, ನೋಡುವ ಪರಿಸರ ಸೌಂದರ್ಯ, ಪ್ರೇಕ್ಷಣೀಯ ಸ್ಥಳಗಳು ಹೀಗೆ ಹತ್ತಾರು ಅವಕಾಶಗಳನ್ನು ಬಲಿ ಕೊಟ್ಟು ನಮಗರಿವಿಲ್ಲದಂತೆ ಕಳೆದುಹೋಗುತ್ತ ಕೊನೆಗೊಮ್ಮೆ ಸತ್ತೇ ಹೋಗುತ್ತವೆ.

ಅದಕ್ಕೆ ಹಿರಿಯರು *ಸತ್ತವರ ಬಾಯಲ್ಲಿ ಮಣ್ಣು* ಎಂದು ಇಂತಹ ಸಾವಿಗೆ ಮೂದಲಿಸುತ್ತಾರೆ.

ನಮಗರಿವಿಲ್ಲದೆ ನಮ್ಮ ಬಾಯಲ್ಲಿ ಮಣ್ಣು ಬೀಳುವ ಮೊದಲು ನಮಗೆ ಸರಿ ಅನಿಸುವ ಖುಷಿ ಕೊಡುವ ಕೆಲಸ ಮಾಡಿಬಿಡೋಣ.

ನಿನ್ನ

*ಅಲೆಮಾರಿ*

( ಸಿದ್ದು ಯಾಪಲಪರವಿ )

೩-೨-೨೦೧೮

Tuesday, January 30, 2018

ಸಿದ್ಧೇಶ್ವರ ಸ್ವಾಮೀಜಿ ಹಾಗೂ ಪದ್ಮಶ್ರೀ

*ಪೂಜ್ಯ ಸಿದ್ದೇಶ್ವರ ಸ್ವಾಮೀಜಿ ಹಾಗೂ ಪದ್ಮಶ್ರೀ*

ನಿರೀಕ್ಷೆಯಂತೆ ಸಿದ್ದೇಶ್ವರ ಸ್ವಾಮೀಜಿಗಳು ಪ್ರಶಸ್ತಿ ಸ್ವೀಕರಿಸದಿರಲು ನಿರ್ಧರಿಸಿ ತಮ್ಮ ನಿಜ ವಿರಕ್ತಿ ಸಾಬೀತು ಮಾಡಿದ್ದಾರೆ.

ನುಡಿದಂತೆ ನಡೆಯುವುದು ಸರಳವಲ್ಲವೆಂದು ಗೊತ್ತಿದ್ದರೂ ಎಲ್ಲರೂ ನುಡಿಯುತ್ತಲೇ ಇದ್ದಾರೆ ನಡೆಯಲಾಗದೆ.

ಜನಸಾಮಾನ್ಯರಿಗೆ ಆಧ್ಯಾತ್ಮಿಕ ತಿರುಳನ್ನು ಗ್ರಹಿಸುವ ಮನೋಧರ್ಮ ಬೆಳೆಸಿದ ಪೂಜ್ಯರ ಸಾಧನೆ ಹಿಂದೆ ದೊಡ್ಡ ಪರಿಶ್ರಮವಿದೆ.

ವೇದಾಂತ ಸಾರವನ್ನು ಜನರಿಗೆ ತಲುಪಿಸಲು ಸನ್ಯಾಸ ಸ್ವೀಕರಿಸಿದರೂ ಕಾವಿಗೆ ಬಲಿಯಾಗದೆ ನಿಜ ಶರಣರಾದವರು.

ಇಂದು ಕಾವಿ,ಸನ್ಯಾಸ,ಧರ್ಮ ಹಾಗೂ ಲಿಂಗಾಯತತ್ವ ತುಂಬ ಗೊಂದಲಕ್ಕೆ ಬಿದ್ದಿರುವಾಗ ಕಾವಿಧಾರಿಗಳಾಗದ ಸಿದ್ದೇಶ್ವರ ಶ್ರೀಗಳು ಹೆಚ್ಚು ಪ್ರಸ್ತುತವೆನಿಸುತ್ತಾರೆ.

ಬುದ್ಧ,ಅಲ್ಲಮ,ಬಸವ,ವೇದಾಂತ,ಗೀತೆ, ಝೆನ್,ಸೂಫಿ ಹಾಗೂ ಎಲ್ಲ ಜಾಗತಿಕ ಧರ್ಮಗಳ ಸಾರವನ್ನು ಅಂಗೈಯಲ್ಲಿ ಹಿಡಿದರೂ ಬೇಕಾದವರಿಗೆ ಬೇಕಾದಷ್ಟೇ ಉಣಬಡಿಸುವ ತಾಯ್ತನವಿದೆ.

ಹೆಚ್ಚು ತಿನಿಸಿ ಆರೋಗ್ಯ ಕೆಡಿಸುವ ಪಾಂಡಿತ್ಯ ಪ್ರದರ್ಶನವಿಲ್ಲ.

ಬಹಳಷ್ಟು ಜನ ತುಂಬಾ ಶಾಸ್ತ್ರಗಳನ್ನು ಅರಗಿಸಿಕೊಂಡು ಕುಡಿದು ನಡೆ ಇಲ್ಲದೆ  ಭಾರವಾಗಿದ್ದಾರೆ.

ಆಧ್ಯಾತ್ಮದ ಸಾರವನ್ನು ಬದುಕಿನಲ್ಲಿ ಪಾಲಿಸುತ್ತ ಜನರಿಗೆ ತಲುಪಿಸುವ ಏಕ ಮಾತ್ರ ಉದ್ದೇಶ.

ಎಲ್ಲ ವರ್ಗದ ಸಾವಿರಾರು ಜನರನ್ನು ಸೆಳೆಯುವ ಏಕೈಕ ಪ್ರವಚನಕಾರರು.
ಅವರ ಅನುಕರಣೆಯಲ್ಲಿ ಅನೇಕರು ತಯಾರಾಗಿದ್ದರೂ ಅವರೇರಿದೆತ್ತರಕೆ ಏರಲಾಗಿಲ್ಲ.

ಇಂಗ್ಲಿಷ್, ಮರಾಠಿ, ಹಿಂದಿ ಭಾಷೆಗಳಲ್ಲಿಯೂ ಅಷ್ಟೇ ಸಮರ್ಥವಾಗಿ ಪ್ರತಿಪಾದಿಸಿ ಇಡೀ ಲೋಕ ಸುತ್ತಿದ್ದಾರೆ.

ಸರಳತೆ, ಸಮಾಧಾನ, ನಿರ್ಲಿಪ್ತತೆ, ನಿರಾಕರಣೆ, ನಿರ್ಭಯ ಪದಗಳಿಗೆ ಉಪಮೇಯವೇ ಸಿದ್ಧೇಶ್ವರರು.

ತಮ್ಮ ಮಾತುಗಳಲ್ಲಿ ಅಪ್ಪಿ ತಪ್ಪಿಯೂ ಕೆಟ್ಟ, ನಕಾರಾತ್ಮಕ ಪದಪ್ರಯೋಗ ಮಾಡದೇ ಸಕಾರಾತ್ಮಕ ಆಲೋಚನೆಯಡೆಗೆ ಕರೆದೊಯ್ಯುವ ಲೈಫ್ ಸ್ಕಿಲ್ ಸಿದ್ಧಾಂತ.

ಹಾಗಂತ ಇವರನ್ನು ಎಲ್ಲರೂ ಒಪ್ಪುವ ವಾತಾವರಣವೂ ಇಲ್ಲ.

ಕೆಲವು ಅಪ್ಪಟ ಬಸವಾಭಿಮಾನಿಗಳು 'ಕೇವಲ ಶರಣ ಸಿದ್ಧಾಂತ ಪ್ರತಿಪಾದಿಸಲಿ, ಎಲ್ಲವೂ ಅಲ್ಲೇ ಇದೆ, ಮತ್ತೇಕೆ ಅಲ್ಲಿ ಇಲ್ಲಿಯದು ಹೇಳುವುದು' ಎಂಬ ತಕರಾರು ಎತ್ತುತ್ತಾರೆ.

ಅದಕ್ಕೆ ಉತ್ತರಿಸುವ ಅಗತ್ಯವಿಲ್ಲ. ಎಲ್ಲರಿಗೆ ಎಲ್ಲವೂ ಗೊತ್ತಿದೆ.

ನಮ್ಮ ಆಚರಣೆ ಹಾಗೂ ನಂಬಿಕೆಗಳು ಏನೇ ಇದ್ದರೂ ಬೇರೆ ಧರ್ಮಗಳನ್ನು ಓದಬಾರದೇಕೆ? ಎಂಬ ಪ್ರಶ್ನೆ ನನ್ನನ್ನೂ ಕಾಡುತ್ತಿದೆ.

ಎಲ್ಲರ ವಾದ-ವಿವಾದಗಳಿಗೆ ಉತ್ತರ ಕೊಡುವ ಅಗತ್ಯ ಹಾಗೂ ಅನಿವಾರ್ಯತೆ ಇಲ್ಲ ಬಿಡಿ.

ಆಧ್ಯಾತ್ಮಿಕ ಲೋಕಕ್ಕೆ ಭಾರತದ ಕೊಡುಗೆ ಅಪಾರವಾಗಿದೆ. ಅನೇಕ ಗೊಂದಲಗಳನ್ನು ನಿವಾರಿಸಲು ಸಾವಿರಾರು ಸಿದ್ಧೇಶ್ವರ ಅಪ್ಪಗಳ ಅಗತ್ಯವಿರುವಾಗ ಎಲ್ಲವನ್ನೂ ಇವರಿಂದ ಏಕೆ ನಿರೀಕ್ಷಿಸಬೇಕು.

ನಿಜ ಸಂನ್ಯಾಸಿಗಳಿಗೆ ಜ್ಞಾನರತ್ನ ಸಾಕು.
ದ್ಯಾನಸೂತ್ರ ಬೇಕು.

ಅರಿವನ್ನು ಹರವಿ ಹೋದ ಬುದ್ಧ, ಬಸವಾದಿ ಪ್ರಮಥರು ಹಾಗೂ ದಾರ್ಶನಿಕರು ಪ್ರಶಸ್ತಿಗಳನ್ನು ಮೀರಿ ಇನ್ನೂ ಜೀವಂತವಾಗಿದ್ದಾರೆ.

ಕೆಲವರು ಆರಂಭದಲ್ಲಿ ಸದ್ದು ಮಾಡಿ ಬೆಳೆದ ಮೇಲೆ ಅಥವಾ ತಮ್ಮ ಕೊನೆಯ ದಿನಗಳಲ್ಲಿ ತಮ್ಮ ಮೌಲ್ಯಗಳಿಗೆ ಅಪಚಾರವಾಗುವ ಕೆಲಸ ಮಾಡಿ ಪ್ರಶಸ್ತಿಗಳನ್ನು ಕಸಿದುಕೊಳ್ಳುವ ಪ್ರಸಂಗ ತಂದೊಡ್ಡುತ್ತಾರೆ.

ವ್ಯಕ್ತಿಯ ಇಡೀ ವ್ಯಕ್ತಿತ್ವದ ಹರವು ಕೊನೆಯ ಅಧ್ಯಾಯದಲ್ಲಿ ನಿರೂಪಿತವಾಗುತ್ತದೆ.

ಅದೇ ಕಾರಣಕ್ಕೆ ಐನ್ ಸ್ಟೀನ್ ಜೀವಂತವಾಗಿರುವಾಗ ತನ್ನ ಪ್ರತಿಮೆ ನಿಲ್ಲಿಸುವುದನ್ನು ವಿರೋಧಿಸುತ್ತಾನೆ.

ಅದೇ ಸಮರ್ಥ ನಿಲುವಿನ ಶ್ರೀಗಳ ನಿರ್ಧಾರ ನನಗಂತೂ ಖುಷಿ ಎನಿಸಿದೆ.

ಪೂಜ್ಯರಿಗೆ ಅನಂತ ಕೋಟಿ ಶರಣುಗಳು.

----ಸಿದ್ದು ಯಾಪಲಪರವಿ.

ಬಾ ಮನದಾಳದಿ ಜೋಪಾನವಾಗಿರಲು

*ಬಾ ಮನದಾಳದಿ ಜೋಪಾನವಾಗಿರಲು*

ಹೊಳೆವ ಕಂಗಳು ಹಿತವಾದ ನೋಟ
ಮುಗಿಯದ 'ಸವಿ' ಮಾತುಗಳು
ಅಗೋಚರ ಸೆಳೆತ
ಬಿದಿಗೆ ಚಂದ್ರನ ಬೆಳದಿಂಗಳು

ಅವ್ವನ ಅಕ್ಕರೆ
ಮಗಳ ಮಮತೆ
ಸಂಗಾತಿಯ ಸಂಭ್ರಮ
ಎಂದೋ ಎಲ್ಲೋ
ಕಳೆದು ಹೋದ ಮನದನ್ನೆ
ಸಿಕ್ಕ ಹರುಷ

ಸೌಂದರ್ಯ ರಾಶಿಯಲಡಗಿದ
ಸ್ನಿಗ್ದ ನಗುವಿನಲೆಗಳ ಜುಳು ಜುಳು ನಿನಾದ
ನೋಡುವ ನೋಟ ಕೀಳಲಾಗದ ಜಡಪಡಿಕೆ
ಹೇಳಲಾಗದ ಬಳಲಿಕೆ

ಒಮ್ಮೆ ಜೋರಾಗಿ ಕೂಗಿ ಹೇಳುವಾಸೆ
ಆದರೆ ಕಳೆದುಕೊಂಡರೆ ಹೇಗೆ ಎಂಬ ಭಯ

ಹೇಳಲಾರೆ ಏನನ್ನೂ ಕೇಳಲಾರೆ ನೀ
ಒಲಿಯುವತನಕ
ಮೌನದಿ ನಿನ್ನ ಹೃದಯದಲಿ
ಜೋಪಾನವಾಗಿ ಅಡಗಿ
ಅವಿತಿರುವೆ ಕಣ್ಣಿಗೆ ಕಾಣದ ಹಾಗೆ

ಕೊಡಲು ಏನೂ ಇಲ್ಲ ಪ್ರೀತಿಯ ಬಿಟ್ಟು
ಈಗ
ನಾ ವನವಾಸಿ ರಾಮ ಕೇವಲ
ಹನುಮನಾಲಿಂಗನವ ಬಿಟ್ಟು

ಬಿಗಿದಪ್ಪಿ ಮುದ್ದು ಮಾಡಿ ರಮಿಸಿ
ಸಂತೈಸಿ ಸಂತಸವ
ಹಂಚಿ ಹಗುರಾಗಬಲ್ಲೆ
ಆದರೆ ಈಗ ಅದಕೂ ಒಂದು
ಅಲ್ಪ ವಿರಾಮ !

ಸಾಗರದಾಚೆ ಬೆಟ್ಟದ ಮೇಲಿರುವ
ಗಮ್ಯ
ತಲುಪುವತನಕ ಮನದ ಸುತ್ತಲೂ
ನಿಯಂತ್ರಣದ ಕೋಟಿ ಬೇಲಿ
ತುಡುಗರು ನುಗ್ಗದ ಹಾಗೆ !!

ಕಾಯುವೆ ಕಾಲ ಮಾಗಿ
ಹಣ್ಣಾಗುವತನಕ
ಕಣ್ಣ ರೆಪ್ಪೆಯ ಪಿಳುಕಿಸದೇ

ಅಲ್ಲಿಯತನಕ ಬಾ ಮನದಾಳದಲಿ
ಜೋಪಾನವಾಗಿರಲು !!!

---ಸಿದ್ದು ಯಾಪಲಪರವಿ

Wednesday, January 24, 2018

ನಾನು ಮತ್ತು ಅಪ್ಪ

ನಾನು ಮತ್ತು ಎಂದೂ ಮರೆಯಾಗದೆ ಅಪ್ಪ

ಕಳೆದುಕೊಂಡವರ ಕುರಿತು ಬರೆಯುವಾಗ ತುಂಬಾ ನೋವಾಗುತ್ತೆ . ಅದರಲ್ಲೂ ಬದುಕು ಹಾಗೂ ಅಸ್ತಿತ್ವ ಕೊಟ್ಟ ' ಅಪ್ಪ ' .

ನಾವು ಸಹಜವಾಗಿ ಈ ಭೂಮಿಗೆ ಬಂದಿದ್ದೇವೆ ಅಪ್ಪ ಬರೀ ನೆಪ ಎಂಬ ವಾಸ್ತವದ ಸಿದ್ಧಾಂತ ಅಪ್ಪನ ವಿಚಾರವಾಗಿ ಸರಿಹೊಂದುವುದಿಲ್ಲ.

ಅಪ್ಪನನ್ನೂ ಬೇರೆಯವರಿಗಿಂತ ಸರಿಯಾಗಿ ಗ್ರಹಿಸಿದ್ದೇನೆ ಎಂಬ ಗರ್ವ.  ಸರಿಸುಮಾರು ಐವತ್ತು ವರ್ಷ ಕಳೆದರೂ ನಾಲ್ವತ್ತು ವರುಷಗಳ ಒಡನಾಟ ಒಡಲೊಳಿದೆ.

ಬಾಯಲ್ಲಿ ಬಂಗಾರದ ಚಮಚೆ ಇಟ್ಟುಕೊಂಡು ಹುಟ್ಟಿದ್ದರೂ ಮುಂದೆ ಅನುಭವಿಸಿದ್ದು ಬರೀ ನೋವು-ಸಂಕಷ್ಟ. ವ್ಯಾಪಾರದಲ್ಲಿನ ಹಾನಿ , ಕುಟುಂಬದ ಆಸ್ತಿ ವಿಭವಿಜನೆಯ ಅಸಮಾನತೆ ಹೀಗೆ ಹತ್ತಾರು ಸವಾಲುಗಳನ್ನು ತುಂಬಾ ಸಮಾಧಾನದಿಂದಲೇ ನಿಭಾಯಿಸಿದ.

ಬಾಲ್ಯದ ಅವಿಭಕ್ತ ಕುಟುಂಬ ವ್ಯವಸ್ಥೆಯಲ್ಲಿ ನನಗೆ ಪಾಲಕರ ಒಡನಾಟ ಕಡಿಮೆ ಆದರೂ ನಂತರದ ಕಾಲೇಜು ದಿನಗಳಲ್ಲಿ he became my best friend ಮುಂದಿನ ಎಲ್ಲ ಆರ್ಥಿಕ ಸಂಕಷ್ಟಕ್ಕೆ ನಾನು ನೆರವಾಗಲಿಲ್ಲ ಅದೂ ಸಾಧ್ಯವಾಗಲಿಲ್ಲ ಎಂಬ ನೋವು ಈಗಲೂ  ನನ್ನಲಿ ಉಳಿದಿದೆ.

ನನಗೆ ಆರ್ಥಿಕವಾಗಿ ಹೆಚ್ಚು ನೆರವು ನೀಡದೇ strict ಆಗಿ ಬೆಳೆಸಲು ಇದ್ದ ಅನೇಕ ಕಾರಣಗಳನ್ನು ಕೊಂಚ ಸಿಟ್ಟಿನಿಂದ ಸಕಾರಾತ್ಮಕವಾಗಿ ಸ್ವೀಕರಿಸಿದೆ . ಅದು ದೊಡ್ಡ ಪಾಠವಾದರೂ finance management ನಲ್ಲಿ ನಾನು ಎಚ್ಚತ್ತುಕೊಳ್ಳದೇ ತುಂಬಾ ಆರ್ಥಿಕ ಸಂಕಷ್ಟಗಳನ್ನು ಎದುರಿಸುವಂತಾಯಿತು. 

I have my own reservations about finance management even today. ನನಗೆ ಬದುಕು ಸಾಗಬೇಕು ಅಷ್ಟೇ. ತುಂಬಾ plan ಅಗತ್ಯವಿಲ್ಲ ಎಂಬ ಕೆಟ್ಟ ಧೋರಣೆ. I may be wrong also.

ಆದರೆ ಅಪ್ಪ ಹಾಗಲ್ಲ ದೇವರಿಗೆ ಹಾಕುವ ಹಣವನ್ನು ಕಟ್ಟಿ ಇಡುತ್ತಿದ್ದ ಯಾವುದೇ ಕಾರಣಕ್ಕೂ ಬೇರೆ ಕೆಲಸಕ್ಕೆ ಬಳಸುತ್ತಿರಲಿಲ್ಲ. ಎಂತಹ ಕಠಿಣ ಸಂದರ್ಭದಲ್ಲಿಯೂ ನನಗೆ ಹೆಚ್ಚು ಹಣ ಕಳಿಸಲೇ ಇಲ್ಲ ಹೀಗಾಗಿ ವಿದ್ಯಾರ್ಥಿಯಾಗಿದ್ದಾಗ ತುಂಬಾ ಎಚ್ಚರಿಕೆಯಿಂದ ಖರ್ಚು ಮಾಡುತ್ತಿದ್ದೆ even  tour ಹೋಗಲಿಲ್ಲ.

ಉದ್ಯೋಗ ಸೇರಿದ ಮೇಲೆ ಹಣ ಗಳಿಸುವ ವೃತ್ತಿ ಹಾಗೂ ಪ್ರವೃತ್ತಿ ನನಗೆ ಬರಲಿಲ್ಲ I totally neglected and accepted the suffering.
ಈ ಕುರಿತು ಇದ್ದ ಸಿಟ್ಟನ್ನು ಅಪ್ಪ ಆತ್ಮೀಯರ ಮೂಲಕ ಹೇಳಿಸಿದರೂ ಕೇಳಿಸಿಕೊಳ್ಳುವ ಸ್ಥಿತಿಯನ್ನು ನಾನು ದಾಟಿದ್ದೆ.

ತುಂಬಾ ಸಂಕಷ್ಟಗಳ ಸಂದರ್ಭದಲ್ಲಿ ಒಮ್ಮೆ ಕೇಳಿದೆ  ನೇರವಾಗಿ impossible ಅಂದ. ನನಗೆ ದುಃಖವಾಯಿತಾದರೂ positive ಆಗಿ ಸ್ವೀಕರಿಸಿ ಅದೇ ಸ್ನೇಹವನ್ನು ಮುಂದುವರೆಸಿ ಪಾಠ ಕಲಿತುಕೊಂಡೆ.

'ನಿಮ್ಮದು ಪೂರ್ವಜರ ಆಸ್ತಿ  ಅಪ್ಪನ ಮೇಲೆ ಕೇಸು ಹಾಕಿ ನಿನ್ನ ಪಾಲು ಕೇಳು ' ಅಂದ ಕೆಲವರ ಸಲಹೆಯನ್ನು ತಿರಸ್ಕರಿಸಿದೆ. ನನ್ನ ಸಹನೆ ಹಾಗೂ ವಿವೇಚನೆಗೆ ನಾನು ಸದಾ ಋಣಿ .

ಈ ನನ್ನ ನಿರ್ಧಾರ ಅಪ್ಪನಿಗೆ ಗೊತ್ತಾಯಿತಾದರೂ ಈ ಕುರಿತು ನಾವಿಬ್ಬರೂ ಚರ್ಚಿಸಲೇ ಇಲ್ಲ.

'ಒಂದು ಬಿರುಗಾಳಿಯ ಕಥೆ' ಪುಸ್ತಕ ಬಿಡುಗಡೆಯ ಸಂದರ್ಭದಲ್ಲಿ ಉದ್ಯಮಿ ವಿಜಯ್ ಸಂಕೇಶ್ವರ ಅವರು ನನ್ನ ಕುರಿತು ವ್ಯಕ್ತಪಡಿಸಿದ ಮೆಚ್ಚುಗೆ ಕಂಡು ಬೆರಗಾದರು. ನನ್ನ ಮಗ ಲಕ್ಷ್ಮಿ ಪುತ್ರನಾಗದಿದ್ದರೂ ಸರಸ್ವತಿಯ ಮೂಲಕ ಹೆಸರು ಮಾಡಿದ್ದಾನೆ ಎಂದು ಅವರಿಗೆ convince ಆಯಿತು.

He was very friendly with my mother. ಅವ್ವ ಹೋದ ಮೇಲೆ ತುಂಬಾ ಒಂಟಿತನದಿಂದ ಒದ್ದಾಡಿದ್ದು ನನಗೆ ಅರ್ಥವಾಯ್ತಾದರೂ ಇಷ್ಟು ಬೇಗನೆ ಹೋಗಬಹುದು ಅಂದುಕೊಂಡಿರಲಿಲ್ಲ.

He was very normal and healthy but he decided to go away. ವಿದೇಶಕ್ಕೆ ಹೋಗಲು passport ಬಂದಿತ್ತು  ಆದರೆ ಹೋಗಲಾಗಲಿಲ್ಲ . ಹೆಣ್ಣು ಮಕ್ಕಳ ಬಗ್ಗೆ ಚಿಂತೆಯೂ ಇತ್ತು ಆ ಜವಾಬ್ದಾರಿಯನ್ನು ತುಂಬಾ balance ಮಾಡಿದ ಒದ್ದಾಟ ಈಗ ಅರ್ಥವಾಗಿದೆ but I fulfill all his  incomplete desires without sharing with others , it's my strong promise to him.

I totally miss you ಅಪ್ಪ.

You have left so many values and valuable things with me...

---ಸಿದ್ದು ಯಾಪಲಪರವಿ

ಹುಡುಗಿಯರೇ ಹೀಗೆ

*ಹುಡುಗಿಯರೇ ಹೀಗೆ*

ಆಕರ್ಷಣೆಯ ಚಿಲುಮೆ
ಬತ್ತದ ಜೀವನೋತ್ಸಾಹ

ಬರೀ ಮಾಯೆಯೆಂಬ
ಭ್ರಾಂತು

ಅವ್ವ ಗೆಳತಿ ತಂಗಿ
ಹೆಂಡತಿಯಾಗಿ
ಹಿತವಾಗಿ ಕಾಡುವ
ಹೆಣ್ಣು ಮಾಯೆ ಅಲ್ಲ

ಮಗಳ ರೂಪದ
ವಾತ್ಸಲ್ಯದ ಖಣಿ

ಮುತ್ತಿನ ಮಹಿಮೆಯ
ಬಿಸಿಯಪ್ಪುಗೆಯ
ಬೆರಗಿನಲಿ ಕರಗಿಸಿ

ಮನವನಾವರಿಸಿದ
ಬೆಡಗಿ

*ಮಗಳು*
ಅಭಿವ್ಯಕ್ತಿಗೆ
ಜನುಮ ದಿನದ
*ಶುಭಾಶಯಗಳು*

*ಸದಾ ಖುಷಿಯಾಗಿರು*

---ಸಿದ್ದು ಯಾಪಲಪರವಿ

ಮುನ್ನುಡಿಗೊಂದು ಬೆನ್ನುಡಿ

*ಮುನ್ನುಡಿಗೊಂದು ಬೆನ್ನುಡಿ*

ಬದುಕೆಂಬ ಪುಸ್ತಕದ ಮೊದಲ
ಬರಹ

ಬಣ್ಣದ ಚಿತ್ತಾರಗಳು‌ ಮೈಮನದ
ತುಂಬ

ಆಟ ನೋಟ ಮೊಂಡಾಟಕೆ
ಸಾವಿರದ ನೆನಪು

ಅವ್ವನ‌ ಪಡಿಯಚ್ಚ ಹೆಗ್ಗಳಿಕೆ
ಹೇಗೋ ಕಳೆದ ಬಾಲ್ಯ

ಈಗ

ಹಲವು ಕನಸುಗಳ ಹರವಿ
ಭವಿತವ್ಯದ ಜಪ

ಬಂದುದನೆದುರಿಸುವ ಎದೆಗಾರಿಕೆ
ಸಾಕು
ನೋವ ನಲಿವಾಗಿಸಲು

ದುಃಖ-ದುಮ್ಮಾನ ಬರದಿರಲಿ
ಅದರೆ
ತಿಳಿದೋ ತಿಳಿಯದೋ ಕಾಡದಿರಲಿ

ಬೆಳೆದಂತೆ ಬದುಕು ಜಡ ಕಳೆದು
ಹೋದ
ಮುಗ್ಧತೆ ಹುಡುಕಿದರೂ ಸಿಗದು

ಮತ್ತೆ ಮಗುವಾಗಲು
ಮಾಗಬೇಕು ಮೈಮನ

ಹೀಗೆ ನೂರಾರು ಭರವಸೆಗಳ
ಹೊತ್ತು ನೇರ ಹಾದಿಯಲಿ
ಸಾಗಿರಲಿ ಜಾಣನಡೆ ಜೋಲಿ
ಹೊಡೆಯದೆ

ಕಾಪಿಟ್ಟು‌ ಕಾಯಲಿ‌‌ ಎಚ್ಚರ
ಒಳಗೂ-ಹೊರಗೂ

ಹಡೆದರೂ ಹಣೆಬರಹ
ಬರೆಯಲಾಗದ
ಅಸಹಾಯಕತೆಯಲೂ
ನೂರೆಂಟು ಆಸೆಗಳು

ಕಾಯ್ದು ಕಾಪಾಡಲು ಕಾಲದಾಟದಲಿ
ಅವನುಂಟು

ಹರಕೆಯ ಬುತ್ತಿ ಹಳಸದಿರಲಿ
ಕೂಸೆ
ಬಾಳ ಪಯಣದ ಹಾದಿಯಲಿ.

ಹುಟ್ಟು ಹಬ್ಬದ ಹಾರ್ದಿಕ ಶುಭಾಶಯಗಳು.

----ಸಿದ್ದು ಯಾಪಲಪರವಿ.