ಪ್ರೇಮ ಬಿಕ್ಷೆ

*Begging is better than stealing*

ಪ್ರೇಮ ಬಿಕ್ಷೆ

ಬಿಕ್ಷೆ ಬೇಡುವುದು ಸಣ್ಣ ಸಂಗತಿಯೇನಲ್ಲ
ಹಂಗು ಹರಿದು ಮಾನ ಬಿಟ್ಟು
ಬೀದಿಗಿಳಿಯುವುದು ಎಲ್ಲಿಲ್ಲದ
ಅವಮಾನ
ಅಂಗೈಯಲಿ ಜೀವ ಹಿಡಿದು
ಅರೆಬೆತ್ತಲೆಯಾಗಿ ತಿರುಬೋಕಿಯ
ಹಾಗೆ ತಿರುಗುವುದು ನಡು
ಬೀದಿಯಲಿ ಮಾನ ತೂರಿಕೊಂಡಂತೆ

ಕರುಳು ಹಿಂಡಿ ಹೊಟ್ಟೆ ತಳಮಳಿಸಿ
ಉಸಿರು ಗಟ್ಟಿ ಹಪಾಹಪಿಸಿ ಸಾಯುವೆ
ಎನಿಸಿದಾಗ ತಟ್ಟೆ ಕೈ ಸೇರಿ ಮೈ
ಮನಗಳು ಅರೆಬೆತ್ತಲಾಗಿ  ಕಣ್ಣು
ಕತ್ತಲಾಗಿ ಬೀದಿಗೆ ದೂಡುತ್ತವೆ

ಆತ್ಮಗೌರವ ಮನಸಾಕ್ಷಿ ಮಂಗ
ಮಾಯ ಈಗ ಬರೀ ಬದುಕು
ಸಾವು ದೂರಾದರೆ ಸಾಕು

ಮನೆಯೊಡತಿ ಮುಂದೆ ಹೋಗೆಂದಾಳು
ಎಂಬ ತಲ್ಲಣ
ಅನ್ನಲಿ ಬಿಡಿ ಮಾನಕ್ಕಿಂತ ಪ್ರಾಣ
ದೊಡ್ಡದು

ಎದೆ ಬಗೆದು ಕರುಳು ಕಿತ್ತಿ ಬರುವ ಹಾಗೆ
ಕೂಗಿದರೆ ಹೋಗೆನ್ನಲಾರಳೆಂಬ ಹುಚ್ಚು
ನಂಬಿಗೆ

ಆದರೂ ಬದುಕಿಗೆ ಬೇಕಲ್ಲ ತಂ
ಬಿಗೆ ಆ ಬಿಗಿಯಲಿ ಬಿಗುಮಾನ
ಬಿಟ್ಟು ಕೇಳುವ ಕರ್ಮ

ಕಳುವು , ಮೋಸ , ಸುಳ್ಳು ಹಾಗೂ
ಮಳ್ಳನ ಮುಖವಾಡವಿಲ್ಲದ
ಈ ಬಿಕ್ಷೆಯ ಬದುಕು ಹೀನಾಯವಲ್ಲ
ಎಂಬ ಸಂತೃಪ್ತಿ

ಕಡು-ಕಷ್ಟಗಳ ದೂರ ಮಾಡಿ ಮೈ
ಮನಗಳ ಮಾನ ಕಾಪಾಡಲು
ಬೇಡುವ ಬಿಕ್ಷೆಗೆ ಶಿಕ್ಷೆ ಬೇಡ

ಕಾಲನ ಮಹಿಮೆಯ ಕೂಸುಗಳು
ಮಿಂಚಿ ಮಾಯವಾಗುವ
ಸಂಚನು ಬಲ್ಲವರು ಯಾರು ?

ಮುಂದೆ ಹೋಗೆಂದರೆ ಹೋದಾನು
ತಿರುಗಿ ನೀ ಬೇಕೆಂದಾಗ ಬರಲಾರ
ಹಾಕಿಬಿಡು ಅನ್ನ ಹಳಸುವ ಮುನ್ನ
ಬೇರೆಯವರು ಕನ್ನ ಹಾಕುವ ಮುನ್ನ.

---ಸಿದ್ದು ಯಾಪಲಪರವಿ