ಬಣ್ಣವಿಲ್ಲದ ಮನಸು
ಬಣ್ಣ ನೋಡಲಿಲ್ಲ ಬವಣೆ ನೋಡಲಿಲ್ಲ
ಬದುಕೂ ನೋಡಲಿಲ್ಲ ದೂರದಿಂದಲೇ
I love you , I want you
ಎಂದು ಮುಗ್ಧತೆಯಿಂದ ಕೂಗಿ
ಹುಚ್ಚನೆನಿಸಿಕೊಂಡೆ ಏಕೆಂದರೆ
ನನ್ನದು ಮುಖವಾಡವಿಲ್ಲದ ಮುಖ
ಮನಸಿನಲಿ ಗರಿಗೆದರಿದ ಆಸೆಗಳು ರೆಕ್ಕೆ
ಹಚ್ಚಿಕೊಂಡು ಹಾರಲು ಬಿಟ್ಟು ಭಾವನೆಗಳ
ಕೆಣಕಿ ಬಲಿಯಾದೆ
ಆದರೆ ನಿನ್ನ ಜಾಣತನ ಅತಿ ಮಧುರ
ಬೆಟ್ಟದಷ್ಟು ಆಸೆಗಳಿದ್ದರೂ ಮುಚ್ಚಿಡುವ
ನೂರಾರು ಮುಖವಾಡಗಳ ಹಿಂದೆ ಅಡಗಿ
ಅವಿತಿರುವ ಆಸೆಗಳ ಇರಿದು
ಹೊರಗೆಳೆದೆ
ನಾನು ಅಪರಾಧಿಯೂ ಅಲ್ಲ ಅವಿವೇಕಿಯೂ
ಅಲ್ಲ ಅಡಗಿರುವ ಘಮಲನು ಹೀರಿ ನಿನ್ನ
ಮುಖವಾಡವ ಕಳಚಿದಕ್ಕೆ ಎಲ್ಲಿಲ್ಲದ ಕೋಪ
ತಾಪ ಇಲ್ಲದ ವಿಕೋಪ
ಈಗಲೂ ಅಷ್ಟೇ ಕಾಯುವೆ ಹುಚ್ಚು ಸೈತಾನನ
ಹಾಗೆ ಕರಗದ ಹಿಮದಲಿ ಅಡಗಿರುವ ಬೆಚ್ಚನೆ
ಪ್ರೀತಿಯ ಒಪ್ಪಿಕೊಂಡು ಬಿಗಿದಪ್ಪು ಉಸಿರು
ನಿಲ್ಲುವ ಮುನ್ನ ಹಸಿರು ಬಾಡುವ ಮುನ್ನ
---ಸಿದ್ದು ಯಾಪಲಪರವಿ
No comments:
Post a Comment