Friday, January 19, 2018

ಕಳೆದು ಹೋಗಿರುವೆ

*ಕಳೆದು ಹೋಗಿರುವೆ*

ಭಾವಲೋಕದ ಭ್ರಮೆಯಲಿ
ಜೀವ ಅಂಗೈಯಲಿ ಸಾವಿರದ
ಕನಸುಗಳಲಿ ಲೀನ

ವಾಸ್ತವದ ಹಂಗ ಹರಿದು
ಪ್ರೇಮ
ಸಂಗದ ಗುಂಗಲಿ ನಾ
ಅರಿವಿರದೆ
ಕಳೆದುಹೋಗಿರುವೆ

ನಂಬಿಕೆ ಜಾಡಲೊಂದು
ಬರೀ
ವ್ಯಾಮೋಹ

ಬೇಕೋ ಬೇಡೋ
ಎಂದರಿಯದ ಮೂಢ
ಮನಸು

ಹಗಲ ರಾತ್ರಿಯಾಗಿಸಿ
ರಾತ್ರಿ ಕಣ್ಣರಳಿಸಿ

ಮನವ ಗುದ್ದಲಿ ಮಾಡಿ
ಭಾವನೆಗಳ ಹರಗಿ
ಹೊಲವ ಒಲವಿನಿಂದ
ಹಸನ
ಮಾಡುವ ಉಮೇದು

ಕಳೆವ ಕೀಳುವ ಜಿದ್ದಾ ಜಿದ್ದು
ಹೊಳಪ ಹೆಚ್ಚಿಸುವ ಹುಸಿ
ಹುಂಬತನ

ಹುಚ್ಚಾಟಗಳ ಹಂಗ ಹಿಡಿದು
ಏನಾದರೂ
ಪಡೆಯುವ ಜಡ ಜಂಜಡದ
ಧಿಮಾಕು

ಇದೆಲ್ಲ‌ ಮೀರಿದ ಸಹಜ
ಸುಂದರ ವಾಸ್ತವದ ಹಾದಿ
ತುಂಬ
ಕಲ್ಲು-ಮುಳ್ಳು

ನಾ ಸ್ವಚ್ಛ ಮಾಡಿ
ನಡೆಯಲೇಬೇಕು

ಭಾವಲೋಕದ ಸಂಗಾತಿಗಳ
ಸಂಗತಿಗಳಿಗೆ ಇರಬಹುದೆ
ಅಲ್ಪಾಯು ?

ನಾ ಸಾಯುವ ಮುನ್ನ ನೂರು
ಕಾಲ ಬದುಕಿ ಬದುಕ ತಿರುಳ
ತಿಳಿದು ಜ್ವಾಕ್ಯಾಗಿರಬೇಕು

ನಡು ಹಾದಿಯ ದಟ್ಟ ಇರುಳ
ಛಳಿಯಲಿ ಗಡಗಡ ನಡುಗಿ
ನರಳಿದರೆ ಬಿಸಿ ತಾನಾಗಿ
ಬಸಿಯದು

ಯಾರೂ ಹೊದಿಸಲಾರರು
ತಾವಾಗಿ ಪ್ರೀತಿಯ ಕೌದಿ

ಹೋಗು ನೋಡಲ್ಲಿ

ನೀ

ನಂಬಿದವರು ಎಷ್ಟೊಂದು
ಬೆಚ್ಚಗೆ  ಹಾಯಾಗಿ ಮಲಗಿ
ನಸು ನಗುತಿರಲು

ನಿನಗೇನು ಧಾಡಿ ಕೊರಗಿ
ಕೊರಗಿ
ಮುಲುಗಲು

ಇದು ವಾಸ್ತವದ ನೆಲೆ
ಭ್ರಮೆಗಿಲ್ಲ ಮೂರು ಕಾಸಿನ
ಬೆಲೆ

ಒಂಚೂರು ಒಳಗಣ್ಣ ತೆರೆದು
ಒಳಗಿಳಿದು ನಿನ್ನೊಳಗಿಳಿದು
ನೋಡು

ನೋಡು ನೋಡು ನೋಡು

ನೀ ನಿನಗಾಗಿ
ನಿನಗಾಗಿಯೇ ನಿನ್ನನೊಮ್ಮೆ.

-----ಸಿದ್ದು ಯಾಪಲಪರವಿ.

Thursday, January 18, 2018

ಓಲೆ-೧೯

ಒಲವಿನೋಲೆ-೧೯

ಹಲೋ ಚಿನ್ನು,

ಒಗಟು ಬಿಡಿಸುವ ಜೀವಪಯಣದಲಿ ಅನೇಕ ಒಗಟುಗಳು.
ಹೊಯ್ದಾಟ ನಿಂತಾಗ ಅನೇಕ ಒಗಟುಗಳಿಗೆ ಉತ್ತರ ಸಾಧ್ಯ.

ನಾವೇ ಹೆಣೆದುಕೊಂಡ ಬಲೆಯಲಿ ನಾವೇ ಸಿಕ್ಕು ಒದ್ದಾಡುತ್ತೇವೆ.

ಒಳಹೋಗುವುದು ಬಹಳ ಸುಲಭ ಆದರೆ ಹೋಗುವ ದಾರಿ‌‌ ಗೊತ್ತಿರುವ ನಾವೇ ಹೊರಬರಲು ಚಡಪಡಿಸುವುದೂ ಕೂಡಾ ಒಗಟೇ.

ಕಾರಣ ತುಂಬ ಆಸೆಪಟ್ಟು ತಿಂದು ಕರಗಿಸಲಾಗದೇ ಒದ್ದಾಡಿದಂತೆ.

ಮಾನವೀಯ ಸಂಬಂಧಗಳು ವಿಚಿತ್ರ. ಅರ್ಥವಾಗಿರದ ಅನೇಕ ಸಂಗತಿಗಳು ಅರ್ಥವಾಗಿಬಿಡುತ್ತವೆ.

ಜೊತೆಗೆ ಬರುವವರು ನಮ್ಮ ಹಾಗೇ ಇರಲಿ ಎಂದು ಬಯಸುವದೇ ನಿರಾಸೆಗೆ ಮೂಲ ಕಾರಣ.

ಬರುವುದೇನೋ ಬರುತ್ತಾರೆ ತುಂಬಾ ಕಿರಿ ಕಿರಿ‌ ಎನಿಸಿದರೇ ಹೇಳದೇ‌ ಕೇಳದೇ ಬಿಟ್ಟು ಪರಾರಿಯಾಗುತ್ತಾರೆ.

ಸಂಬಂಧಗಳಿಗೆ ಇರಬಹುದಾದ ಮಿತಿಯನ್ನು ನಾವೇ ತಡುವಿ ವೈಯಕ್ತಿಕ ಅವಲೋಕನದ ಮೂಲಕ ಮಿತಿ ಹೇರಿಕೊಳ್ಳಬೇಕು.

ಪ್ರತಿಯೊಂದಕ್ಕೂ ತನ್ನದೇ ಆದ *ಎಲಾಸ್ಟಿಕ್ ಲಿಮಿಟ್* ಇರುತ್ತದೆ.

ಆ ಲಿಮಿಟ್ ಹರಿಯುವವರೆಗೆ ಮಾತ್ರ ಎಳೆದಾಡಬೇಕು.
ತುಂಬಾ ಎಳೆದಾಡಿಕೊಂಡು ಹರಿದರೆ ಎಲಾಸ್ಟಿಕ್ ತನ್ನ ಶಕ್ತಿ ಕಳೆದುಕೊಂಡು ನಿಸ್ತೇಜವಾಗುತ್ತದೆ.

ಹರಿದುಹೋದ ಎಲಾಸ್ಟಿಕ್ ತನ್ನ ಬೆಲೆ ಕಳೆದುಕೊಂಡು ಬಿಡುತ್ತೆ.

ಯಾವುದೋ ಕಾರಣಕ್ಕೆ, ಏನೋ ಲೆಕ್ಕ ಹಾಕಿ, ಏನೋ ಹೇಳಲು ಹೋಗಿ ಬಂಧನಗಳು ಸಡಿಲವಾಗುವ ಮುನ್ನ ಎಚ್ಚತ್ತುಕೊಂಡು bondage just ಉಳಿಸಿಕೊಳ್ಳೋಣ ಕೊಂಚ ರಾಜಿಯಾಗಿ.

ಮುಂದೆ ಹಂತ ಹಂತವಾಗಿ ಕಾಲ ಎಲ್ಲವನ್ನೂ ಸರಿ‌ ಮಾಡುವವರೆಗೆ ಕಾಯೋಣ.

ನಿನ್ನ ಪ್ರೀತಿಯ

*ಅಲೆಮಾರಿ*

( ಸಿದ್ದು ಯಾಪಲಪರವಿ)

Wednesday, January 17, 2018

ರೈತ ರೈತ

ರೈತ ದ್ವಿಪದಿಗಳು

ಉಳುವ ಯೋಗಿಯ ದುಡಿವ
ಕೈಗಳಿಗೆ ಸಾವಿರದ ಶರಣು

ದಣಿವರಿಯದ  ಧಣಿ
ಭೂಮಿಯನಾಳುವ ಹೊನ್ನಿನ ಗಣಿ

ಜನರ ಹಸಿವು ಇಂಗಿಸುವ ದೇವ
ಭೂತಾಯಿಗಾಗಿ ದುಡಿಯುವ ಮಹದೇವ

ರೈತ ನೀನೆಂದರೆ ಈ ದೇಶ
ಜಗ ಮೆಚ್ಚುವ ಸರ್ವೇಶ

ಸಂಪೂರ್ಣ ಬಾಗಿದರೂ ಬೆನ್ನು
ಮಣ್ಣೇ ಇವನ ಪಾಲಿನ ಹೊನ್ನು

---ಸಿದ್ದು ಯಾಪಲಪರವಿ.

Monday, January 15, 2018

ಸಿದ್ದೇಶ್ವರ ಸ್ವಾಮೀಜಿ

*ಪೂಜ್ಯ ಸಿದ್ಧೇಶ್ವರ ಸ್ವಾಮೀಜಿಗಳು*

ನುಡಿದಂತೆ ನಡೆಯುವ ಪರಮಾತ್ಮನನ್ನು ತೋರಿಸುವ ಪುಣ್ಯಾತ್ಮರು.

  ಈ ದೇಶದಲ್ಲಿ ನೂರಾರು ಮತ ಪಂಥಗಳಿವೆ ಲಕ್ಷಾಂತರ ಸಾಧು ಸಂತರಿದ್ದಾರೆ ಎಲ್ಲದಕ್ಕೂ ಸಾಕಾಗುವಷ್ಟು ಜನರ ಸಂಖ್ಯೆಯೂ ಇದೆ.

ಧರ್ಮ ನಿರಂತರವಾಗಿ ಚಲಾವಣೆಯಲ್ಲಿರುತ್ತದೆ ,ಧರ್ಮ ,ಜಾತಿಗಳ ಹೆಸರಿನಲ್ಲಿ ಏನೆಲ್ಲಾ ಮಾಡಬಹುದಾದ ದೇಶ ನಮ್ಮದು.

ಮೋಕ್ಷದ ನೆಪದಲ್ಲಿ ದೇವರ ಹುಡುಕಾಟದಲ್ಲಿರುವವರಿಗೆ ದೇವರನ್ನು ತೋರಿತ್ತೇವೆಂದು ಅನೇಕರು ತಾವೇ ದೇವರೆಂದು ನಂಬಿಸಿಬಿಡುತ್ತಾರೆ.

ನಂಬಿದವರನ್ನು ಶೋಷಣೆ ಮಾಡುತ್ತಾ ಬಯಲಾಗಿಬಿಡುತ್ತಾರೆ.

ಕೃಷ್ಣ ಬುದ್ಧ ಮಾಹಾವೀರ ಏಸು ಪೈಗಂಬರ ಹಾಗೂ ಬಸವಾದಿ ಶರಣರು ಧರ್ಮ ಹಾಗೂ ಆಧ್ಯಾತ್ಮಕ್ಕೆ ಇರುವ ವ್ಯತ್ಯಾಸವನ್ನು ಸಾರಿ ಹೇಳಿದ್ದಾರೆ.

ಆದರೂ ನಾವು ಧಾರ್ಮಿಕ ಏಜಂಟುರುಗಳ ಮೂಲಕವೇ ದೇವರನ್ನು ಹುಡುಕುವ ಅಂಧಕಾರದಲ್ಲಿದ್ದೇವೆ.

ಆದರೆ ಪರಮ ಪೂಜ್ಯ ಸಿದ್ಧೇಶ್ವರ ಮಾಹಾಸ್ವಾಮಿಗಳು ತಮ್ಮ ಪ್ರವಚನಗಳ ಮೂಲಕ ದೇವರನ್ನು ಕಾಣುವ  ಸನ್ಮಾರ್ಗ ತೋರುತ್ತಲಿದ್ದಾರೆ.

ಘಮಘಮಿಸುವ ಪರಿಮಳದಂತೆ ,ಹಿತವಾಗಿ ಬೀಸುವ ತಂಗಾಳಿಯಂತೆ ನಿರ್ಲಿಪ್ತ ಭಾವದಿ ಶಬ್ದ ಗಳು ಅರಳುತ್ತಾ ಮನಸ್ಸನ್ನು ಪ್ರವೇಶಿಸುತ್ತವೆ.

----ಸಿದ್ದು ಯಾಪಲಪರವಿ.

ಪುಸ್ತಕ ಸಂಕ್ರಮಣ

*ಪುಸ್ತಕ ಸಂಕ್ರಮಣ*

ನನ್ನ ಹಬ್ಬಗಳೇ ಹೀಗೆ. ಎಲ್ಲಂದರಲ್ಲಿ. ಈ ವರ್ಷದ ಸಂಕ್ರಮಣ ಬೆಂಗಳೂರಿನ ಪುಸ್ತಕ ಸಡಗರ. ನಾಗರಾಜ ವಸ್ತಾರೆ ಹಾಗೂ ಅಪರ್ಣಾ ಅವರ ಸೌಜನ್ಯದ ಕರೆಗೆ ಬಂದದ್ದು ಸಾರ್ಥಕ.

ವೇದಿಕೆ ಮೇಲೆ, ಮುಂದೆ ಹಾಗೆ ಅಂಕಣದ ತುಂಬೆಲ್ಲ ಚಿರಪರಿಚಿತ ಮುಖಗಳ ಮಧ್ಯೆ ನಾನೇ ಲೋ ಪ್ರೊಫೈಲ್.

ಅದೇನೋ ವಿಚಿತ್ರ. ಮುಖಪುಸ್ತಕದ ಭಾರಿ ಗೊತ್ತಿರುವ ಗೆಳೆಯರೂ 'ಅಯ್ಯೊ ಗೊತ್ತೇ ಸಿಗಲಿಲ್ಲ' . ಅಂತಾರೆ.

ಎಂದಿನಂತೆ ಸಾಂಪ್ರದಾಯಿಕ ಮಾತುಗಳ ಸುರಿಮಳೆ. ನಾವು ಎಷ್ಟೇ ಹೊಸ ನಮೂನೆ ಬರೆದರೂ ಮಾತಿನ ಜಾಡು ಹೊಗಳಿಕೆ ಹಾದಿ ಹಿಡಿದುಬಿಡುತ್ತೆ. ನಮ್ಮ ನಿರೀಕ್ಷೆಯೂ ಹಾಗೆ ಅನ್ನಿ.

ಆದರೆ ಬರಹಗಾರ,ವಿಮರ್ಶೆ ಹಾಗೂ ಹೊಗಳಿಕೆಗಳ ಸೌಜನ್ಯಗಳ ಬದಿಗಿರಿಸಿ ತಮ್ಮ ಪಾಡಿಗೆ ತಾವು ಬರೆಯುತ್ತಿರಬೇಕು.

ಯಾರು ಏನೇ ಹೇಳಿದರೂ ಉಳಿಯುವುದು ಮಾತ್ರ ಉಳಿಯುತ್ತೆ.

ವಚನಕಾರರು ಹಾಗೂ ಶೇಕ್ಷಪಿಯರ್ ಹೊಗಳಿಕೆ ಹಾಗೂ ತೆಗಳಿಕೆಗಳ ಲೆಕ್ಕಿಸಿದ್ದರೇ ಅಂದೇ ಸಾಯುತ್ತಿದ್ದರು.
ಆದರೆ ಅವರು ಇಂದಿಗೂ ಇದ್ದಾರೆ ಮುಂದೆಯೂ ಇರುತ್ತಾರೆ.

ವಸ್ತಾರೆ ಹಾಗೂ ಅಪರ್ಣಾ ಇಬ್ಬರೂ ಸೆಲಿಬ್ರಿಟಿಗಳು, ಸೌಜನ್ಯ ಕಾಪಾಡಿಕೊಂಡು ಪ್ರೀತಿಯಿಂದ ಕರೆದ ಕೂಗಿಗೆ ಬಂದವರು ಖುಷಿಪಟ್ಟರು.

ಕಾರ್ಯಕ್ರಮ ಸೊಗಸಾಗಿತ್ತು. ಹೊಸ ವಿನ್ಯಾಸ, ಹೊಸ ಭಾಷೆಯ ಮೂಲಕ ವಸ್ತಾರೆ ಹೊಸ ಓದುಗರನ್ನು ಸೃಷ್ಟಿ ಮಾಡಿದ್ದಾರೆ. ಮಾರಾಟದ ಆತಂಕವೂ ಇರದ ಹಾಗೆ.

All the best and congratulations to Nagaraj Ramaswamy Vastarey.

---ಸಿದ್ದು ಯಾಪಲಪರವಿ.

ಓಲೆ-೧೮

ಒಲವಿನೋಲೆ-೧೮

ಹಲೋ ಚಿನ್ನು,

ತುಂಬ ದಿನಗಳಿಂದ ಬರೆಯಲಾಗಲಿಲ್ಲ.ಕಾರಣ ಕೊಡುವುದು ಬಲು ಕಷ್ಟ ಬರಹ-ಬದುಕಿನ ಹಾಗೆ.

ಓಡಾಟ ನಿಲ್ಲುವುದಿಲ್ಲ ಅನಿಸಿದೆ.ಗಡಿಯಾರದ ಪೆಂಡೊಲಮ್ ಹಾಗೆ.

ಓಡಾಡುವುದು meaningless ಅನಿಸಿದರೂ ಅರ್ಥ ಹುಡುಕುವುದು ಜಾಣತನ ಅಲ್ಲ,ಅಲ್ಲಿ ಅರ್ಥ ಇರಬೇಕಲ್ಲ.

ಆದರೂ ಹುಡುಕುವ ಹುಡುಗಾಟ ನಿಂತಿಲ್ಲ. ಬೇರೆಯವರಿಗೆ ಬಿಡು.
ಕಟ್ಟಿಕೊಂಡವರಿಗೆ ಒಗಟಾಗಿದ್ದೇನೆ.

ಯಾಕೋ ಒಗಟು ಬಿಡಿಸುವುದು ಬೇಡ ಎನಿಸಿದೆ. ಮೊದಲು ನಾನು ಬಿಡಿಸಿಕೊಳ್ಳುತ್ತೇನೆ.

ಬದುಕು ನನ್ನ ಪಾಲಿಗೆ ಸ್ವಲ್ಪ ಭಿನ್ನವಾಗಿ ಕಾಣಿಸಿ‌ ಅರ್ಥವಾಗುವ ಸಡಗರದ ಸಂಕ್ರಮಣವಿದು.

ಕಾಯುವಿಕೆ ಹೆಚ್ಚು meaningful ಅನಿಸತೊಡಗಿದೆ.

I missed so many things, many things tantalised with me but tolerated... have to tolerate.

ಪುಸ್ತಕ ಬಿಡುಗಡೆಗೆ ಬೆಂಗಳೂರಿಗೆ ಬಂದೆ. ನನ್ನ ಪುಸ್ತಕದ ಕೆಲಸ ತಾರ್ಕಿಕ ಅಂತ್ಯ ಕಂಡಿದೆ.

ಕೊಂಚ ಸಮಾಧಾನ.
ಎಲ್ಲವೂ ಪೂರ್ಣ ಪರಿಪೂರ್ಣ ಮಾಡಲಾಗುವುದಿಲ್ಲ ಎಂಬ ಅಳುಕಿತ್ತು.

ಮೂರು ತಿಂಗಳು ಪಟ್ಟು ಹಿಡಿದು ಕುಳಿತು ಬರೆದೆ.‌ ಎಲ್ಲರೂ ಸಹಿಸಿಕೊಂಡರು. ಅದರಲ್ಲೂ ಮನೆಯಲ್ಲಿ ಸಂಗಾತಿ ರೇಖಾ, ಜುಗಲ್ ಬರಹಕ್ಕೆ ಸಾಂಗತ್ಯದ ಸಾತ್ ನೀಡಿದ ಕಾವ್ಯಶ್ರೀ ಅವರ‌ ಸಹಕಾರ ನೆನೆಯುವೆ.

ಪ್ರಕಾಶಕ ಮಿತ್ರ ವಿ.ಎಂ.ಮಂಜುನಾಥ, ಕುಂಚನೂರ ಆನಂದ, ಮಾರ್ಗದರ್ಶಕರಾದ ಪ್ರೊ.ರಂಗನಾಥ ಸರ್ ಹಾಗೂ ಅನೇಕರು ನನ್ನ ಹುಚ್ಚಾಟಗಳನ್ನು ಏನೋ ಸಾಧಿಸಬಹುದು ಎಂಬ ಭರವಸೆಯಿಂದ ಸಹಿಸಿಕೊಂಡಿದ್ದಾರೆ.

ಭರವಸೆಗಳು ಬದುಕಿ ಬೆಳೆಯಬೇಕು. ಹಾಗೆಯೇ ಉಳಿಯಬಾರದು.

Everything waits for its own time zone but we have to accelerate it continuously.

ಒಂದು assignment ಮುಗಿದ ಕೂಡಲೇ ಖಾಲಿ ಖಾಲಿ ಅನಿಸಿಬಿಡುತ್ತೆ. ಮತ್ತೊಂದು ಹೊಸ ತುಡಿತ. ತಲ್ಲಣ.

ಸಂಸ್ಥೆಯ ಕೆಲಸವೂ ನಡೆದಿದೆ. ಮುಗಿದಾಗ ಹೊಸ ಗೆಲುವು.

ಸಂಕ್ರಮಣದ ಶುಭಾಶಯಗಳು. ಎಲ್ಲರಿಗೂ.

ಪ್ರೀತಿಯಿಂದ

ನಿನ್ನ

ಅಲೆಮಾರಿ

( ಸಿದ್ದು ಯಾಪಲಪರವಿ )

೧೫-೧-೨೦೧೮.

Saturday, January 13, 2018

ನಿತ್ಯವೂ ಹಬ್ಬ-ಹರಿದಿನ

*ನಿತ್ಯವೂ ಹಬ್ಬ-ಹರಿದಿನ*

ಜೀವಪಯಣದಲಿ ಅಸಂಖ್ಯ
ಹಬ್ಬಗಳು ಆಚರಿಸುವ ತಾಕತ್ತಿರಲು ನಿತ್ಯವೂ ಸಡಗರ-ಸಂಭ್ರಮ

ಇಲ್ಲದಿರೆ ಇಲ್ಲಿ ಎಲ್ಲವೂ
ಖಾಲಿ
ಖಾಲಿ

ಸುಖವಿರಲು ಸಡಗರದಿ ನಡೆ
ದುಃಖವಿರಲು ಮರೆಯಲು ಓಡು
ಓಡುತ ಓಡುತ್ತಾ ಓಡುವುದೊಂದೇ
ನಿನ್ನ ಪರಮ ಗುರಿ

ಬದುಕು ಯಾರಿಗೂ ಕಾಯದೇ
ಸಾಗುತಿರೆ ಕಾಯುವದಾದರೂ
ಯಾರಿಗೆ

ಸಾಗಲೇಬೇಕು ಸರಿಕಂಡ ಹಾದಿಯಲಿ
ಸಪ್ತ ಸ್ವರಗಳ ನಿನಾದದಲಿ ನಿಧಾನದಿ...

ನಾವು ಕೇವಲ ನಮಗಾಗಿ

ತಾಳ ತಪ್ಪದೆ ಬಾಳು ಬೀಳದ
ಹಾಗೆ
ಜೋಲಿ ಹಿಡಿದು ಜ್ವಾಕಿಯಿಂದ
ಜೀಕುವ
ಈ ಜೀವ ಜೋಕಾಲಿ

ಇರುವ ಸಡಗರ ಹಿಡಿದು
ಬರುವ ಸಂಭ್ರಮ ನೆನೆದು
ಬರದಿರೆ ಕೊರಗಿ ನಲುಗದೆ
ನಸುನಗುತ ಸಾಗೋಣ

ಇದು ದೇವನೊಲುಮೆಯಾಟ
ಇಲ್ಲಿ ನಿತ್ಯವೂ ಹಬ್ಬ-ಹರಿದಿನ

ಉಸಿರ ಹಸಿರಲಿ ಮೈಯ ಬಿಸಿಯಲಿ
ಅಡಗಿರುವ ಬಿಸುಪ ಹಸನದಿ
ಕಾಪಿಟ್ಟು ಕಾಲ ಕಳೆಯುವ

ಕಾಲ ಕಾಯುವುದಿಲ್ಲ ಯಾರಿಗೂ
ನನಗೂ ನಮಗೂ ನಿನಗೂ

ಇಂದು ಸಂಕ್ರಮಣ ನಾಳೆ
ಉಗಾದಿ ನಾಡಿದ್ದಿ ದೀಪಾವಳಿ
ಮತ್ತದೇ ಹೋಳಿಗೆ ಹುಗ್ಗಿ

ಬರೀ ಜೋಳಿಗೆ ಈ ದುಡಿವ
ಕೈಗಳಿಗೆ ನಸುನಗುತ ಅವನ
ಬೇಡುತ ಹಾಕಿದ ಸವಿಯುತ
ನಿತ್ಯವೂ ಸಂಭ್ರಮಿಸೋಣ.

----ಸಿದ್ದು ಯಾಪಲಪರವಿ.