ಒಂದಾಗೋಣ

ಒಂದಾಗೋಣ

ಕನಸಿಗೆ ಕಣ್ಣಿಲ್ಲ ವಯಸಿಲ್ಲ
ಹಂಗಿನರಮನೆಯ ವಾಸವಿರದ
ಸಂಚಾರಿ ಭಾವನೆಗಳ ವಾರಸುದಾರಿಕೆಯ
ದೌಲತ್ತಿನಲಿ ಆನೆ ನಡೆದದ್ದೇ ದಾರಿ

ಚಾರಿತ್ರ್ಯದ ಗುಂಗು ಭವಿತವ್ಯದ ಹಂಗು
ಮಾರು ದೂರ ಕಂಡದ್ದು ಕಂಡಂತೆ
ಅನಿಸಿದ್ದ ಹೇಳುತ್ತ ಉತ್ತರದ ಗೊಡೆವೆಗೆ
ಕಾಯದ ನಿರ್ಲಿಪ್ತ ನುಡಿ

ಮೆಚ್ಚಿದ ಮೆಚ್ಚುವ ಸಂಗತಿಗಳ ಪಡೆಯುವ
ತೀವ್ರ ಹಂಬಲದ ಭರದಲಿ ತಡೆಯಿಲ್ಲದ ವೇಗ

ಕನಸು ಸುಂದರ ಮಧುರವೆನಿಸಿದರೆ ಇಲ್ಲದ
ನಖರಾ ಬಿಟ್ಟು ಹತ್ತಿರ ಬಾ ಬಿಗಿದಪ್ಪಿ
ಪಿಸುಮಾತಲಿ ನಸುನಗುತ ಕನಸುಗಳಿಗೆ ಬಣ್ಣ
ಬಳಿದು ಒಂಚೂರು ಆಳಕಿಳಿದು ಸುಖದ
ಸುಪ್ಪತ್ತಿಗೆಯನೇರು ರಾಣಿಯಂತೆ ಮೆರೆ

ಸುಕ್ಕುಗಟ್ಟಿ ಜೋತು ಬಿದ್ದು ಮಣ್ಣು ಸೇರುವ
ದೇಹಕೆ ಚಾರಿತ್ರ್ಯದ ಪಟ್ಟ ಕಟ್ಟಿ ಮನಸಿನ ಚಟ್ಟ
ಕಟ್ಟಬೇಡ

ಮನಸು ಹಂಬಲಿಸಿ ಸ್ವೀಕರಿಸಿ ಬಲಿಯಾಗಿ
ಮೈಮನಗಳು ಪುಳಕಗೊಂಡು
ಚಾರಿತ್ರ್ಯದ ಮುಖವಾಡ ಕಳಚಿ
ಬಿದ್ದಾಗಲಾದರೂ ಬಿಡು ಒಣ ಜಂಬವ

ಬಾ ಮನದ ಮಾತನಾಲಿಸಿ ಮನಸೋತು
ಮೈಮರೆತು ಒಂದಾಗಿ ಬಿಂದುವಾಗೋಣ.

---ಸಿದ್ದು ಯಾಪಲಪರವಿ